د اسراییلو پوځي راډیو خبر ورکړی چې طالبانو له ایران سره ددغه وسله والو د استولو ژمنه کړي ده
د اسراییلو پوځي راډیو دغه خبر په حزب الله پورې تړلي، له الاخبار ورځپاڼې را اخیستی چې که د اسراییلو او حزب الله تر منځ جګړه سخته شوه، نو طالبان به په زرګونو وسله وال د ایران په مرسته تر لبنانه رسوي.
ایران دوه میاشتې وړاندې ویلي وو، طالبانو له دغه هېواد سره لبنان او فلسطین ته د ځانمرګو ډلو د استولو ژمنه کړي ده، خو هغه وخت طالبانو په شدت سره د ایران دغه څرګندونې رد کړې.
په کابل کې د ایران سفیر هم ویلي چې افغانستان د «مقاومت محور» دی او که اړتیا پیدا شي «استشهادي» ځواکونه به له افغانستانه غزې ته واستوي.
د طالبانو او ایران تر منځ ژمنه
الاخبار ورځپاڼه په لبنان کې له حزب الله سره تړاو لري. د اسراییل پوځي راډیو د دغې ورځپاڼې په حواله راپور ورکړی چې د طالبانو مشرانو د ایران له چارواکو سره ژمنه کړې چې د حزب الله په ملاتړ به خپل جنګیالي لبنان ته واستوي چې د اسراییل په خلاف جګړه وکړي.
د غزې پر تړانګه د اسراییل له پوځي برید وروسته، د لبنان حزب الله له اسراییلي پوځ سره نښته وکړه او په دې وروستیو ورځو کې دغو نښتو زور اخیستی.
نور ولولئ: اسلام اباد له طالبانو د ټي ټي پي د له منځه وړلو غوښتنه وکړه
نور ولولئ: د پاکستان پوج: کراچۍ کې مو د ټي ټي پي خطرناکه اوولس کسیز ګروپ نیولی
د لبنان حزب الله لکه حماس په سیمه کې د ایران له ملاتړه برخمنه وسله واله ډله ده.
په تېرو میاشتو کې د طالبانو او حماس ډلې مشرانو څو ځلې ناستې کړې او طالبانو د اسراییل پر ضد د فلسطیني وسله والې ډلې ملاتړ کړی دی.
افغانستان د مقاومت محور
د افغانستان په چارو کې د ایران ځانګړي استازي حسن کاظمي قمي د ۱۴۰۲سلواغې میاشت کې په یوه مرکه کې ویلي و چې افغانستان له غزې لرې دی، خو د «مقاومت محور» برخه ده.
ایران تر خپل ملاتړ لاندې او نورې ډلې چې په سیمه کې د لوېدیځې ټلوالې او اسراییل پر ضد جنګیږي د «مقاومت محور» نوموي.
د حماس د سياسي دفتر غړي حسام بدران د ١٤٠٢ کال د کب په مياشت کې د طالبانو تر واک لاندې له باختر اژانس سره په مرکه کې وويل چې د افغانانو جهاد او په افغانستان کې د طالبانو بريا د حماس لپاره هیله بښوونکي وه.
ایران او طالبان ورځ تر بلې له یوه او بل سره نږدې کېږي او ډېر احتمال دادی چې ایران به د فاطمیون ډلې په څېر له طالبانو هم ورته ډله په منځني ختیځ کې وجنګوي.
