د اسراییل او حماس جګړه؛ یوه برتانوي هوايي شرکت تل ابیب ته الوتنې وځنډولې
![boeing 747 436 british airways(g civl)](https://afghannow.net/wp-content/uploads/2023/10/Boeing_747-436_-_British_AirwaysG-CIVL-348x196.jpg)
برېټیش ایروېز د ناامنۍ له ویرې اسراییلو ته خپلې الوتنې وځنډولې او معلومه نه ده چې بیا به یې کله پیل کړي
کله چې حماس پر اسراییلو بریدونه پیل کړل، نو هلته د ناامنۍ اندېښنې ډېرې شوې او له همدې امله یاد هوایي شرکت تل ابیب ته خپلې الوتنې وځنډولې او وايي چې تر څو حالت عادي نه شي تر هغو به الوتنې ځنډېدلې وي.
نور ولولئ: د اسراییل او حماس جګړه؛ غزه کې وضعیت څنګه دی؟
د برېټانیا هوايي شرکت (برېټیش ایروېز) اعلان وکړ چې په اسراییل کې یې د امنیتي اندېښنو له امله تل ابیب ته ټولې الوتنې وځنډولې.
د ناامنۍ اندېښه ډېره شوې ده
پر اسراییلو د حماس برید نه یوازې هوايي شرکتونه بلکې د تېلو او ګازو شرکتونه هم وارخطا کړي دي. اټکل دادی چې که یاده جګړه وغځېږي، نو کېدای شي چې د تېلو او ګازو تولید هم ټکنی شي او په منځني ختیځ دا ستونزه پراخه شي.
پر دې سربېره یو بل شرکت ورجین اتلانتیک هم وايي چې د مساپرو او عملې د خوندیتوب له امله به د راتلونکو ۷۲ ساعتونو لپاره تل ابیب ته ټولې الوتنې ودروي.
نور ولولئ: د اسراییل او فلسطین جګړه؛ له ۱۰۰۰ زیات کسان وژل شوي
د چهارشنبې په ورځ د برېټانیا د هوايي چلند یوه الوتکه د امنیتي اندېښنو له کبله بېرته لندن ته ستنه شوه.
د اسراییل د هوايي ډګرونو د ادارې یوه ویاند ویلي چې د برېټانیا د هوايي چلند الوتکه د تل ابیب شاوخوا په هوا کې وه چې نږدې په هوا کې توغندي هم را روان و، خو الوتکې یا بن ګوریون هوايي ډګر ته سملاسي کوم ګواښ نه و.
هغه وویل چې، «دا د پیلوټ پرېکړه وه چې برېټانیا ته بېرته ستون شي خو نورې الوتنې نه دي بدلې شوې.»
اسراییلو کې بهرني وګړي د وتو هڅې کوي
په همدې حال کې پر اسراییل باندې د حماس له وژونکو بریدونو وروسته، حکومتونو او هوايي شرکتونو له اسراییل څخه د خپلو وګړو د ایستلو لپاره د الوتنو شمېر زیات کړی دی. له بلې خوا، اسراییلي هوايي شرکتونو اسراییل ته د ریزرف ځواکونو د استولو غوښتنه کړې ده.
حماس ډلې دا ځل پر اسراییلو د تاریخ سخت او لوی برید تر سره کړی چې امریکا او غرب هېوادونه یې هم وارخطا کړي دي، خو مسکو بیا له دواړو لورو غوښتي چې د ملکي وګړو خوندیبوب ته پام وکړي او پر دې سربېره ترکیې بیا ویلي چې دوی د اسراییلو او حماس ډلې تر منځ خبرو ته حاضر دي تر څو د دوی تر منځ جګړه ودرول شي.
اسراییلو پر غزه تر ټولو سخت بمبار کړی او لا روان دی چې ددې بمبار قربانیان ملکي وګړي او عامه تاسیسات دي.