د افغانستان د تاریخي آبداتو ساتنه؛ د لسګونو لرغونو اثارو د ویجاړېدو اندېښنې
د افغانستان د تاریخي آبداتو ساتنه د فرهنګي میراث د خوندي کولو لپاره مهمه بلل کېږي. وزارت د ۷۰ آبداتو د بیارغونې خبر ورکوي، خو د نورو د تخریب اندېښنې شته.
د افغانستان یو شمېر تاریخي آبدات د طبیعي پېښو، جګړو، زړېدو او د کافي څارنې د نشتوالي له امله د زیانمنېدو له خطر سره مخ دي.
د راپورونو له مخې، د جام منار، د بامیانو لرغونې سیمه، جهاننما بڼ، د بېګم منار او د غزني او بدخشان یو شمېر تاریخي آبدات د هغو اثارو په ډله کې دي چې د ساتنې او بیارغونې اړتیا لري.
په همدې حال کې، د اطلاعاتو او کلتور وزارت چارواکي وايي چې په تېرو پنځو کلونو کې یې له ۷۰ څخه زیات تاریخي آبدات بیارغولي دي.
د افغانستان د تاریخي آبداتو ساتنه ولې مهمه ده؟
تاریخي آبدات د افغانستان د فرهنګي هویت، تمدن او د بېلابېلو تاریخي دورو د معمارۍ استازیتوب کوي.
د دغو اثارو زیانمنېدل د هېواد د تاریخي او فرهنګي میراث د یوې برخې له لاسه ورکولو معنا لري.
د تاریخي آبداتو د ساتنې لپاره مسلکي بیارغونه، دوامداره څارنه او د طبیعي او انساني خطرونو مخنیوی اړین بلل کېږي.
د اطلاعاتو او کلتور وزارت ویاند خبیب غفران وايي، دغه وزارت په تېرو پنځو کلونو کې د آبداتو د وضعیت او لومړیتوبونو له مخې له ۷۰ څخه زیات تاریخي اثار بیارغولي دي. د افغانستان د تاریخي آبداتو ساتنه
د نوموړي په وینا، تاریخي آبدات د افغانستان د کلتور، هنر او پخوانۍ معمارۍ په ژوندي ساتلو کې مهم رول لري.
هغه زیاتوي چې دغه اثار د کورنیو او بهرنیو سیلانیانو د راجلبولو او د هېواد د اقتصادي فعالیتونو د پیاوړتیا لپاره هم ارزښت لري.
د لرغونو اثارو قاچاق او د عامه پوهاوي اړتیا
د افغانستان د تاریخي آبداتو ساتنه یوازې د دولتي ادارو مسؤلیت نه دی، بلکې د خلکو همکاري او عامه پوهاوی هم پکې مهم رول لري.
د ټولنیزو چارو کارپوه خبیب حسرت وايي، د لرغونو اثارو د قاچاق مخنیوی او د تاریخي میراث د ارزښت په اړه د خلکو پوهاوی باید زیات شي.
د هغه په وینا، د تاریخي آبداتو ساتنه د ګرځندوی د ودې او د هېواد د اقتصاد د پیاوړتیا لپاره زمینه برابرولای شي.
نوموړی ټینګار کوي چې د تاریخي اثارو د قاچاق مخنیوی او د دغو اثارو د خوندي کولو لپاره هڅې د ټولو ګډ مسؤلیت دی.
د تاریخي آبداتو د ساتنې په اړه خبرې
د اطلاعاتو او کلتور وزارت د فرهنګ او هنر مرستیال شیخ عبدالرحمن طیبي هم څه موده وړاندې د آغاخان فرهنګي بنسټ د پروګرامونو له مسؤل سره کتلي وو.
په دې لیدنه کې د تاریخي آبداتو د ساتنې، استحکام او د عامه پوهاوي د زیاتولو په اړه خبرې شوې وې.
د افغانستان د تاریخي آبداتو ساتنه د هېواد د فرهنګي هویت د خوندي کولو ترڅنګ د ګرځندوی او اقتصادي فرصتونو د پراختیا لپاره هم مهمه بلل کېږي.
خو د تاریخي میراث د دوامدارې ساتنې لپاره د مسلکي بیارغونې، د لرغونو اثارو د قاچاق د مخنیوي او د عامه پوهاوي د زیاتولو اړتیا لا هم پر خپل ځای ده.
