ټوماس وېسټ وايي، د افغان ښځو او نجونو د اساسي حقونو په برخه کې د ملګرو ملتونو وروستۍ هڅې د ستاینې وړ دي

د افغانستان لپاره د امریکا ځانکړي استازي توماس ویسټ د ملګرو ملتونو د عمومي اسمبلۍ د ۷۸مې غونډې په څنډو کې د اسلامي همکاریو د سازمان په ګډون د یوشمېر هېوادونو له استازیو سره لیدلي دي.

نور ولولئ: م.م. کې د امریکا سفیره وايي، امریکا طالبان په رسمیت نه پیژني

نوموړي پر خپل اېکس پاڼه لیکلي، په دغه لیدنو کې يې د افغانستان لپاره د اسلامي هېوادونو د همکاریو د سازمان د ځانګړي استازي او د جاپان، ناروې، اندونیزیا، کاناډا او اېرلنډ هېوادونو له استازيو سره د افغان نجونو او ښځو د زده‌کړو او کار په اړه جلا، جلا خبرې کړې دي.

د افغانستان په اړه د ټوماس بېلابېلې لیدنې

نوموړي ویلي، په دغو لیدنو کې د افغانستان لپاره د ښځو او بشري حقونو په چارو کې د امریکا د بهرنیو چارو وزارت ځانکړې استازې رینا امیري هم ملتیا کوله.

توماس وېسټ په خپلې اېکس پاڼه لیکلي، چې د ملګرو ملتونو د عمومي اسمبلۍ د ۷۸مې غونډي په څنډو کې یې د افغانستان لپاره د جاپان له ځانګړي استازي کانسوک ناګاوکا سره کتلي «جاپان د افغانانو ټینګ ملاتړی دی، د فعالې ډيپلوماسۍ او سخاوتمندانه مرستو له لارې يې د افغانانو بشري او لومړنیو اړتیاوو ته ور دانګلي دي.»

نور ولولئ: امریکا وايي، د طالبانو په رسمیت پېژندل امکان نه لري

همدارنګه نوموړي، د افغان ښځو او نجونو سره د نړۍوال پیوستون د هڅولو په ملاتړ د لوړې کچې د غونډې جوړولو په موخه له کاناډا، اېرلنډ او د اندونیزیا له هڅو مننه کوي.« تر ټولو مهمه دا ده، چې موږ د افغان مېرمنو څخه د طالبانو له خوا د دوی له بنسټیزو حقونو څخه د انکار په اړه نېغ په نېغه واوریدل.»

د افغانستان د اوسني حالت په باره کې د اسلامي همکاريو سازمان رول

د افغانستان په اوسني حالت کې د اسلامي همکاریو سازمان رول اغېزناک تمامېدلی شي، خو په دې شرط چې دغه سازمان پر طالبانو فشار راوړي تر څو ښځو او نجونو ته د کار او زده کړو زمینه برابره کړي.

ټوماس وېسټ ویلي، د ملګرو ملتونو د ۷۸ مې اسمبلۍ د غونډې په څنډو کې يې د افغانستان لپاره د اسلامي همکاریو د سازمان د ځانګړي استازي طارق علي بخیت سره هم لیدلي.

نوموړی زیاتوي، د دغې لیدنې پر مهال يې په افغانستان کې د اسلامي همکاریو د سازمان د فعالیت په اړه خبرې کړې دي.

ښاغلی وېسټ وايي: « د برابرۍ، زغم، زده‌کړو ته د ښځو او نجونو د لاس‌رسي او د ښځو د کار کولو د ملاتړ په اړه د دغه سازمان د پاملرنې ستاینه کوو.»