اړوند خبرونه:
د ایران ولسمشر: له افغانستانه د اوبو د حق د ترلاسه کولو په اړه خبرې کوو
طالبانو په کابل کې د ایران له نوي سفیر سره لیدلي
د طالبانو د بهرنیو چارو وزارت ویلي چې مولوي امیرخان متقي، د چهارشنبې په ورځ په کابل کې د چین د بهرنیو چارو له وزیر وانګ يي سره لیدلي دي.
په خبرپاڼه کې راغلي چې دواړو لورو د اقتصادي، تجارتي او ترانزیټي همکاریو د پیاوړتیا په اړه خبرې کړې دي.
متقي د افغانستان او چین اړیکې «د پراختیا په حال کې» بللي او چین یې د افغانستان مهم سوداګریز شریک ګڼلی دی.
د هغه په وینا، د دواړو هېوادونو د صادراتو او وارداتو کچه هر کال نږدې یو میلیارد ډالرو ته رسېږي. طالبان هیله لري چې دا اندازه لوړه شي.
د طالبانو د بهرنیو چارو وزیر همدارنګه د ګډو کمېسیونونو د جوړولو پر اړتیا ټینګار کړی، څو د اقتصادي همکاریو څارنه وکړي، او په ترانسپورټ، بانکدارۍ او سوداګریز توازن کې یې وړاندیزونه کړي دي.
هغه یو ځل بیا ډاډ ورکړی چې د افغان خاوره به د هېڅ ګاونډي هېواد پر ضد ونه کارول شي.
د چین د بهرنیو چارو وزیر په دې ناسته کې ویلي، چې هېواد یې غواړي د افغانستان صادرات چین ته زیات شي او په “کمربند و راه” طرحه کې د افغانستان د رسمي ګډون هرکلی کوي.
وانګ يي زیاته کړې چې چین تیار دی په افغانستان کې د کانونو او طبیعي زېرمو په برخه کې نوې همکارۍ پیل کړي.
د هغه په وینا، هېواد یې پلان لري چې سږکال په افغانستان کې د کانونو د عملي استخراج لړۍ پیل کړي او د افغان کرنیزو محصولاتو د وارداتو پر وړاندې شته خنډونه لرې کړي.
د چین د بهرنیو چارو وزیر ټینګار کړی چې بېجینګ به د افغانستان تر څنګ سیاسي او اقتصادي ملاتړ ته هم دوام ورکړي.
