د طالبانو حکومت د ریاست الوزرا معاون ملا عبدالغني برادر د اقتصادي همکاریو د پیاوړتیا په خاطر ترکیې ته تللی

عبدالغني برادر چې د ملګرو ملتونو د سفر بندیزونو په نوملړ کې يې هم نوم شته د ترکيې له بهرنیو چارو وزیر حقان فیدان سره يې کتلي.

د هغه دفتر ویلي چې په یاده کتنه کې د اقتصادي همکاریو په پراخېدو، سوداګرۍ او د کډوالو د موضوعاتو په ګډون په دوه اړخیزو موضوعاتو خبرې شوې.

د ترکيې د بهرنیو چارو وزارت پر خپله رسمي ټويټرپاڼه د طالبانو د حکومت د ریاست الوزرا د مرستیال ملا عبدالغني برادر او د ترکیې د بهرنیو چارو د وزیر حقان فېدان د لیدنې تصویرونه خپاره کړي او لیکلي يې دي چې دوی په انقره کې سره کتلي.

د خبرو ډېر تمرکز اقتصادي همکاري وه

د طالبانو د حکومت د ریاست الوزرا اقتصادي معاونیت هم په یوه خبرپاڼه کې کښلي چې دوی په دې کتنه کې “د دوه اړخیزو مناسباتو، سوداګرۍ، سیمه‌ییز اتصال او دواړو هېوادونو ترمنځ د اقتصادي همکاریو د پراختیا په” اړه خبرې کړې.

په دې اعلامیه کې راغلي چې دوی “د دواړو هېوادونو ترمنځ د سوداګرۍ ګډې خونې پر جوړېدو، د دواړو هېوادونو ترمنځ د هوایي دهلېز پر پرانیستلو، د ترکي پانګوالو له لوري په افغانستان کې د پانګونې پر زیاتوالي او افغانانو ته د وېزو په ورکړه کې د آسانتیاوو په برابرولو” هم غږېدلي.

نور ولولئ: ملابرادر وايي چې له اختر وروسته د سالنګ رغولو کار پیلېږي

د ملا برادر دفتر زیاته کړې چې هغه په دې کتنه کې له ترکیې غوښتي چې “په دې هېواد کې له مېشتو افغان مهاجرینو سره ښه سلوک وکړي”.

د امنیت شورا له بندیزونو سره سفر

ملا عبدالغني برادر چې د طالبانو د تحریک له بنسټګرانو دی د دغې ډلې دویم مشر او د حکومت د ریاست الوزرا اقتصادي مرستیال هم دی او د سفر د بندیزونو په نوملړ کې یې د نوم له شتون سره سره په تېر یوه کال کې تر ټولو لوړپوړی طالب چارواکی دی چې بهر سفر کوي.

ترکیه چې د ناټو سازمان غړی هېواد هم دی لا یې د نورې نړۍ په څېر د طالبانو حکومت په رسمیت نه دی پېژندلی خو د ایران او د سیمې د یو شمېر نورو هېوادونو په څېر يې د افغانستان سفارت طالب استازو ته سپارلی.

که څه هم د ترکيې د بهرنیو چارو د وزیر او د ملا برادر په لیدنه کې د پخواني حکومت لخوا ګومارل شوی سفیر هم په هغو تصویرونو کې لیدل کېږي چې د ترکیې د بهرنیو چارو وزارت پر خپله ټویټر پاڼه خپاره کړي.