د امیرخان متقي او روزمیري ډیکارلو لیدنه کې د دوحې پروسې، بشري مرستو، افغان کډوالو، اقلیمي بدلون، پاکستاني هوايي بریدونو او له ملګرو ملتونو سره د همکاریو په اړه خبرې شوې دي.
د طالبانو د بهرنیو چارو وزیر امیرخان متقي د ملګرو ملتونو د سیاسي او سولې ټینګښت په چارو کې له مرستیالې سرمنشي روزمیري ډیکارلو سره د افغانستان پر سیاسي او بشري وضعیت خبرې کړې دي.
د امیرخان متقي او روزمیري ډیکارلو لیدنه داسې مهال شوې چې د افغانستان او ملګرو ملتونو ترمنځ د دوحې پروسه، بشري وضعیت او سیمهییز تحولات د دواړو لورو د بحث مهمې موضوعګانې دي.
د دوحې پروسه او بشري مرستې
په خبرو کې د افغانستان او ملګرو ملتونو ترمنځ د همکاریو پر وضعیت، بشري مرستو او د راستنېدونکو افغان کډوالو پر اړتیاوو بحث شوی دی.
دواړو لورو د راستنېدونکو کډوالو د دوامدار بیا ادغام لپاره د ګډو او همغږو هڅو پر اړتیا هم خبرې کړې دي.
د امیرخان متقي او روزمیري ډیکارلو لیدنه کې د اقلیمي بدلون او اوبو مسئله هم مطرح شوې او په دغو برخو کې د افغانستان اړتیاوې او د همکاریو د پراخېدو امکانات څېړل شوي دي.
د دوحې پروسې په تړاو هم د نویو فرصتونو پر موندلو خبرې شوې دي. بحث پر داسې همکاریو متمرکز و چې عملي پایلې ولري او د افغانانو پر ژوند اغېز وکړي.
پاکستاني بریدونه او د ملکي وګړو خوندیتوب
په لیدنه کې د پاکستان د هوايي بریدونو له امله ملکي وګړو ته د اوښتې مرګژوبلې په اړه اندېښنې هم مطرح شوې دي.
په همدې تړاو د ملکي وګړو د خوندیتوب او په راتلونکي کې د ورته زیانونو د مخنیوي پر اړتیا خبرې شوې دي.
د افغانستان په اړه د نړیوالو راپورونو او ارزونو موضوع هم د بحث برخه وه. په خبرو کې د کره معلوماتو او باوري سرچینو پر کارولو تمرکز شوی، څو د افغانستان وضعیت په راپورونو او ارزونو کې په دقیق او متوازن ډول منعکس شي.
د امیرخان متقي او روزمیري ډیکارلو لیدنه کې د افغانستان لپاره د ملګرو ملتونو د سرمنشي د نوې ځانګړې استازې رباب فاطمې د راتګ او له هغې سره د راتلونکې همغږۍ او همکاریو په اړه هم خبرې شوې دي.
دواړو لورو په پای کې د افغانستان او ملګرو ملتونو ترمنځ د اړیکو او همکاریو د دوام پر اړتیا خبرې کړې دي.
