د اوکراین جګړې د پایتهرسولو لپاره د امریکايي او روسي چارواکو د مذاکراتو په دوام، د روسیې د بهرنیو چارو مرستیال وزیر «سرګئي ریابکوف» ویلي چې مسکو په اوس وخت کې د امریکا ټول وړاندیزونه نهشي منلای.
ریابکوف ویلي چې مسکو د اوکراین جګړې د پایتهرسولو لپاره د امریکا د سولې پلانونه جدي ګڼي، خو په وینا یې چې دا طرحې په اوسنۍ بڼه د منلو نه دي او نهشي منل کېدای.
د روسیې د بهرنیو چارو مرستیال وزیر همداراز ویلي چې د اوکراین جګړې په تړاو د امریکا په وړاندیزونو کې د جګړې اصلي سرچینې ته هېڅ اشاره نه ده شوې او هغه مهم مسایل همداسې پاتې دي.
تر دې مخکې د امریکا ولسمشر، ډونالډ ټرمپ په دغو مذاکراتو کې د مسکو پر سست دریځ اندېښنه ښودلې وه او خبرداری یې ورکړی چې و چې که مسکو د سولې په دې پروسه کې ځنډ وکړي، نو بندیزونه به پرې ولګېږي.
څه موده مخکې د اوکراین جګړې «چې مسکو یې په اوکراین کې د روسیې پوځي عملیات نوموي» په تړاو د سعودي عربستان په کوربهتوب د امریکايي او روسي لوړپوړو چارواکو ترمنځ خبرې پیل شوې چې دې کار د اوکراین ولسمشر، ولادیمیر زلنسکي هم غوسه کړی و.
زلنسکي ویلي وو چې له اوکرایني چارواکو له شتون پرته دوی د اوکراین پر سر هر ډول خبرې اترې کومه مانا نه لري.
