د خبریالانو نړیوال فدراسیون (IFJ) د طالبانو له خوا د افغاننیوز خبري شبکې خبریال مهدي انصاري ته د ۱۸ میاشتو بند سزا په کلکه غندلې ده.
نوموړي بنسټ سهشنبه د مرغومې پر ۲۴مه له طالبانو غوښتي چې په افغانستان کې د خبریالانو خپلسري نیول پای ته ورسوي.
همداراز د خبریالانو نړیوال فدراسیون له نړیوالې ټولنې هم غوښتي چې په افغانستان کې له خبریالانو او بیان ازادۍ څخه ملاتړ وکړي.
په کابل کې د طالبانو یوې محکمې مهدي انصاري د طالبانو له انتقادي رسنیو سره د همکارۍ په تور پر ۱۸ میاشتې بند محکوم کړی دی.
انصاري د طالبانو د استخباراتو له خوا د ۲۰۲۴ د اکټوبر پر ۵مه د کابل په دشت برچي سیمه کې نیول شوی و.
دا په داسې حال کې ده چې د افغانستان خبریالانو اتحادیې (AIJU) ویلي و چې په راتلونکې محاکمه کې د انصاري د سزا کمښت لپاره هڅې روانې دي.
د يادونې ده چې د طالبانو پر افغانستان له واکمنېدو وروسته د انتقادي رسنیو پر ځپلو او د خبريالانو پر نیولو او ربړولو لاس پورې کړی.
