طالبان وايي، د دوحې په ۳مه ناسته کې د خصوصي، مالي، بانکي او د نشهیي توکو مسائل بحث کېږي
د بهرنیو چارو وزارت یو چارواکي ذاکر جلالي پر ایکس پاڼه لیکلي، ملګرو ملتونو د دوحې د درېیمې ناستې اجنډا له دوی سره شریکه کړې چې دغه غونډه به د خصوصي، مالي، بانکي او نشهیي توکو پر موضوعګانو راټوله وي.
ذاکر جلالي په دغې ناسته کې د بشري حقونو په تېره بیا د ښځو د حقونو په اړه څه نه دي ویلي.
نوموړی وايي، په دغه نړیواله ناسته کې د طالبانو د ګډون لپاره ټول شرایط برابر شوي دي.
طالبانو ته د ملګرو ملتونو له لوري ارزښت ورکول
تر دې وړاندې داسې ویل کېده، چې د ښځو د حقونو موضوع به د دغې ناستې غوښنه برخه وي؛ خو په دې وروستیو کې د ځینو نیوکو وروسته داسې برېښي، چې ګواکې ملګرو ملتونو به د طالبانو غوښتنو ته غاړه اېښي وي او په دغه نړۍواله ناسته کې به د ښځو د حقونو موضوع نه شاربل کېږي.
نور ولولئ: طالبان د دوحې ناستې له اجنډا خبر نه لري
نور ولولئ: راتلونکې اوونۍ په کابل کې د سیمهییزو هېوادونو غونډه
د مېرمنو د حقونو په برخه کې ځیو ټولنو او ډلو له همدې امله نیوکې لرلې، له هغې ډلې «د افغانستان د مېرمنو لپاره ټولنې» هم نیوکه کړې وه چې د مېرمنو له برخې اخیستنې پرته د افغانستان په تړاو هر ډول ناسته مشروعیت نه لري.
تر دې وړاندې هېدر بار هم په خپله اېکس پاڼه لیکلي و، چې ملګرو ملتونو د دوحې په ناسته کې د افغان مېرمنو مسله له اجنډا اېستې ده.
د دوحې ۳مې ناستې اجنډا په رسمي ډول نه ده روښانه
د ملګرو ملتونو سازمان چې د دوحې د درېیمې ناستې کوربه دی تر اوسه یې د دغې غونډې جزییات په رسمي بڼه نه دي روښانه کړي.
په پام کې ده، چې دغه ناسته د یو شمېر هېوادونو د ځانګړو استازو په ګډون د ملګرو ملتونو د سازمان تر څار لاندې د قطر په پلازمېنه دوحه کې جوړه شي.
طالبانو ویلي، چې د دوی پلاوی به هم په دغې ناسته کې برخه واخلي؛ خو لا مالومه نه ده چې د طالبانو دغه پلاوی به په کومه کچه وي.
طالبانو دا رنګه خبرداری ورکړی، چې د دوحې د ناستې په جوړښت او اجنډا کې هر ډول بدلون په دغه ناسته کې د دغې ډلې په برخه اخیستنه اغېز پرې اېستلای شي.
افغان مېرمنې او د بشر حقونو سازمانونه هڅه کوي چې ملګري ملتونه له نجونو او مېرمنو سره د طالبانو ناوړه چلند د جنسي اپارتاید په توګه په رسمیت وپېژني.
