طالب چارواکو ويلي چې ډېر ژر به په هېواد کې د سمنټو پنځه لويې فابریکې فعالې شي
د نوموړي په خبره، د یادو فابریکو په فعالېدو سره به افغانستان د سمنټو له پلوه پر خپل ځان بسیا او ورسره به بهر ته د هغو سلګونو ميليونو ډالرو مخه ونيول شي چې د سمنټو واردولو لپاره له هېواده وځي.
«که دا پنځه فابریکې جوړې شي او هر یو یې شل میلیونه بورۍ سمنټ تولید کړي نو افغانستان به د سمنټو په برخه کې پر ځان بسیا شي او هغه پیسې چې زموږ له هېواده د سمنټو په خاطر وځي، مخه به یې ونیول شي.»
نور ولولئ: د ټاپي پروژې تطبیق لپاره تخنیکي چمتووالی نیولی
دا چې اوس مهال موږ په هېواد کې د سمنټو څو فعالې فابرېکې لرو، په دې اړه د کانونو او پټرولیم وزارت ویاند همایون افغان وايي، دمګړۍ په هېواد کې د سمنټو دوه پروژې لرو چې یوه جبل السراج فابرېکه ده چې روزانه شل ټنه تولید لري او بله د غوري سمنټو فابرېکه ده چې د ورځې شاوخوا اویا ټنه تولید لري.
د پنځه میلیونه ټنه سیمنټو تولید
«د سمنټو په برخه کې پنځه لویې پروژې شته چې موږ په کار اچولي یوه یې د کندهار پروژه ده چې د کال به یو میلیون ټنه تولید ولري او همدارنګه ځیني نورې پروژې هم شته چې راتلونکې کې به یې اعلان ته ورکوو. په مجموع کې پنځه د سمنټو لویې پروژې دې که کارونه یې بشپړ شي، موږ به په کال کې پنځه میلیونه ټنه د سمنټو تولید ولرو چې د سمنټو په برخه کې به پر ځان بسیا شو او صادرات به هم ولرو.» د چارو شنونکي هم د یادو پروژو پلي کېدل د هېواد اقتصادي پیاوړتیا او خلکو ته د کاري فرصتونو په برابرلو کې ګټور بولي او زیاتوي چې که چېرې دا پروژې پلي شي او تولید پیل کړي نو له بهر څخه به د سمنټو واردات کم شي.
د اقتصادي چارو شننونکو نظر
د اقتصادي چارو شنونکي وايي، اوس مهال په افغانستان کې د سمنټو غوښتنه زیاته ده، خو تولید یې کم دي او د اړتیا پوره کولو لپاره له ګاونډویو هېوادونو څخه څه باندې اتیا فیصده سمنټ واردوو. «که دا فابرېکې په معیاري او اوسني عصر سره سم برابر شي نو دا کولی شي چې هم د هېواد غوښتنه د سمنټو په برخه کې پوره کړي او هم ډېری خلکو ته د کار زمینه برابره کړي.» د کانونو او پټرولیم وزارت تر دې وړاندې هم یو شمېر افغاني شرکتونو ته د قیمتي ډبرو ځیني کانونه داوطلبۍ ته وړاندې کړي وو چې ځینې یې په دې داوطلبۍ کې بریالي شوي وو.
