طالبان په یوه علامیه کې وايي، له چین سره یې په دوه اړخیزو اړیکو خبرې اترې کړي دي
د طالبانو د بهرنیو چارو وزارت له لوري په خپره شوې خبرپاڼه کې ویل شوي چې، د چین او افغانستان تر منځ د دوه اړخیزو او اقتصادي اړیکو د پراختیا په اړه خبرې وشوې.
په دغې خبرپاڼه کې د افغانستان لپاره د چین د ځانګړي استازي له قوله لیکل شوي، چې امیر خان متقي به د افغانستان د ګاونډیو هېوادونو د بهرنیو چارو وزیرانو په راتلونکي ناسته کې ګډون وکړي.
اقتصادي اړیکې او سیمه ییزې چارې
د طالبانو د بهرنیو چارو وزارت د دوشنبې په ورځ د (لیندۍ پنځمه) د یوې خبرپاڼې په خپرولو سره ویلي، چې د افغانستان لپاره د چین ځانګړي استازي یو شیایو یونګ د طالبانو د بهرنیو چارو وزیر امیرخان متقي سره په کتنه کې د افغانستان او چین پر دوو اړخیزو اړیکو، اقتصادي همکاریو او سیمه ییزو چارو خبرې کړې دي.
نور ولولئ: المرصاد: اسلام اباد د خپلو ګټو په خاطر چین د سیمې نیابتي جګړو ته راکاږي
نور ولولئ: طالبان وايي، افغانستان به د چین د یوه کمربند او سړک پروژې غړی شي
په خبرپاڼه کې لیکل شوي، چې د افغانستان لپاره د چین ځانګړي استازي ویلي، چې د طالبانو د بهرنیو چارو وزیر به د افغانستان د ګاونډیو هېوادونو په راتلونکي ناسته کې ګډون وکړي.
د چین ځانګړي استازي د افغانستان د ګاونډیو هېوادونو د بهرنیو چارو وزیرانو د ناستي د جوړیدو په درشل کې درې ورځې وړاندې ترکمستان او له هغه وړاندې پاکستان ته سفرونه کړي و.
طالبان او په رسمیت نه پېژندل کېدل
سره له دې چې طالبان په نړۍ کې د یوه هېواد له لوري په رسمیت نه دي پېژندل شوي، خو بیا هم چین، روس، ایران او د سیمې ځینې نور هېوادونو د خپلو ګټو په خاطر له طالبانو سره د تعامل تر کچې رسېدلي دي.
د راپورونو له مخې چې د افغانستان د ګاونډیو هېوادونو د بهرنیو چارو وزیرانو د پنځمې ناستې کوربه توب به ترکمنستان وکړي خو د دغې ناستي دقیقه نېټه لا نه ده څرګنده شوې.
پر افغانستان د طالبانو له واکمنېدو وروسته د افغانستان د ګاونډیو هېوادونو د بهرنیو چارو وزیرانو لومړنۍ ناسته د پاکستان په کوربه توب په انلاین ډول ترسره شوه.
همدارنګه د افغانستان د ګاونډیو هېوادونو د بهرنیو چارو وزیرانو دویمه ناسته د ایران، درېیمه د چین او څلورمه په سرمرقند کې ترسره شوه.
د طالبانو واکمن رژیم له یوې خوا له نړۍ سره د تعامل هڅه کوي، خو د داخلي مشروعیت د تر لاسه کولو لپاره هېڅ ډول پرمختګ نه لري.
