د طالبانو لخوا هلمند کې یو کس د نشهيي توکو د پروسس په تړاو نیول شوی

اړوند خبرونه:
د نشهيي توکو ډېرېدل؛ طالبان د تاجکستان ولسمشر څرګندونې ناسمې بولي
ایران له افغانستانه د صنعتي نشهيي توکو قاچاق ډېرېدلو اندېښمن کړی
افغانستان کې د نشهيي توکو پر تولید، کارونې او قاچاق د بندیز په دوام، د هلمند مسوولینو ویلي چې یو وار بیا یې د یاد ولایت په «بغني» ولسوالۍ کې د نشهيي توکو یوه کارخونه له منځه وړې ده.
د دغه ولایت امنیې قوماندانۍ ویلي چې د نشهيي توکو د پروسس په دې کارخونه کې یې نهه پلاستیکي بیلر، شپږ ډبې ډیزل او مکس کېمیاوي مواد، ۱۷۵ کیلو ګرامه سود نشهيي مواد او ۱۲۰ لیټره تیزاب هم ترلاسه او له منځه وړي دي.
د طالبانو په وینا چې د دې کارخونې په تړاو یې یو کس نیولی او څېړنې یې ترې پیل کړې دي.
څو ورځې مخکې د ارزګان د مرکز، ترینکوټ په «دورافشان» سیمه کې د نشهيي توکو یوه کارخونه له منځه وړل شوې وه او په تړاو یې د یو کس د نیولو خبر ورکړ شوی و.
تر دې مخکې هم په یو شمېر ولایتونو کې د نشهيي توکو کارخونې له منځه وړل شوې او په تړاو یې د لسګونه کسانو د نیولو راپورونه ورکړل شوي وو.
د ویلو ده چې په افغانستان کې د طالبانو له بیاځلي واکمنېدو وروسته په ټول هېواد کې د نشهيي توکو پر کښت، کاروبار او قاچاق کلک بندیز لګېدلی دی.