له پخوانیو افغان پوځيانو ملاتړ کمېټه وايي چې د طالبانو په زندانونو کې پخواني پوځیان ربړول کېږي

د افغانستان له پخوانیو پوځیانو د ملاتړ کمیټې د یوې خبرپاڼې په خپرولو سره لیکلي، د نومبر په ۱۸مه د ۵۰۰۰ پوځیانو له ادرسه د امریکا کانګرس ته د دغو پوځیانو وضعیت ته د پاملرنې په موخه لیک استول شوی و، چې کانګرس د دغو پوځیانو د نیونې او وژنې د درولو په برخه کې جدي ګام واخلي.

دغې کمیټې لیکلي:« د امریکا د کانګرس د بهرنیو اړیکو کمیټې له ناستې هرکلی او مننه کوو؛ خو یوازې دغه ناستې بسنه نه کوي، ځکه د افغانستان پخواني پوځیان لا ډېرې پاملرنې ته اړتیا لري.»

له عمومي عفوې سره، سره دا چاره دوام لري

په دغې خبرپاڼه کې راغلي، چې د طالبانو د مشر د عمومي عفوې سره، سره په پراخه کچه د دغو پوځیانو نیونه، ربړونه او وژنه روانه ده.

خبرپاڼې زیاته کړې، چې له دغو پوځیانو یوشمېر یې په ګاونډیو هېوادونو کې په ځانګړې توګه په ایران او پاکستان کې د بد اقتصادي وضعیت، ناروښانه راتلونکې او د نیول کېدو له ګواښ سره مخامخ دي.

نور ولولئ: یو امریکايي افسر: افغانستان کې د پخوانيو پوځیانو ژوند له ګواښ سره مخامخ دی

نور ولولئ: طالبان افغانستان کې ښځې له کار او زده کړو منع کوي، خو بهر کې له نیم لوڅو سره انځورونه اخلي

نور ولولئ: ملګري ملتونه وايي، طالبان له تاوتریخوالي سره مخ ښځې د ژغورلو په خاطر زندان ته لېږي

دغه کمیټه د پخوانیو پوځیانو او په ځانګړې توګه د ښځینه پوځیانو لپاره له نړۍوالې ټولنې او د افغانستان له خلکو غوښتي، چې د دغو پوځیانو د نیونې، ربړونې او وژنې په برخه کې دې پر طالبانو نړۍوال فشارونه راوړل شي؛ چې په دې برخه کې جدي اقدام وکړي.

په وحشتناکه زندانونو کې د پخوانیو پوځیانو ساتل

دغه کمیټه په دې باور ده، چې اوس هم د پخواني حکومت زرګونه پوځیان د طالبانو په پټو او وحشتناکه زندانونو کې بندیان دي او هلته ربړول کېږي.

دوی له ملګرو ملتونو، د سره صلیب له نړۍوالې کمیټې، د بشري حقونو له بنسټونو او نړۍوالې ټولنې غواړي، چې د طالبانو زندانونه په ځانګړې توګه د دغې ډلې د استخباراتو تر کنټرول لاندې زندانونه وڅاري او د دغو پوځیانو د خلاصون په برخه کې بېړنی ګام واخلي.

دوی له امریکا او نړۍوالې ټولنې غواړي، چې د طالبانو د حکومت پر ځای د یوه ډیموکراټیک مشروع حکومت د رامنځته کولو په برخه کې د افغانستان د خلکو ترڅنګ ودرېږي.

د یادونې وړ ده چې د طالبانو له لوري د پخوانیو افغان پوځیانو د وژلو او شکنجه کولو ګڼ راپورونه ورکړل شوي دي.

بل لورته تېره ورځ داسې راپورونه هم خپاره شول چې طالبانو د پکتیا ولایت د زرمت ولسوالۍ پخوانی ولسوال او قومي مشر هم نیولی او زنداني کړی دی.