د پاکستان د پخواني لومړي وزیر عمران خان دوه خویندې، عظمیٰ خان او نورین نیازۍ، له ۵۳ ورځو توقیف وروسته د پنجشنبې په ورځ، د نومبر پر ۱۲مه، خوشې شوې دي.
د رویټرز خبري اژانس د راپور له مخې، دواړه ښځې د لاهور په کوټ لکپت زندان کې ساتل کېدې او د حکومت له خوا د توقیف د حکمونو تر ځنډولو وروسته خوشې شوې دي.
د عمران خان خویندې ولې نیول شوې وې؟
د پاکستان چارواکو ویلي چې عظمیٰ خان او نورین نیازۍ د عامه نظم د ساتنې قانون له مخې نیول شوې وې.
چارواکو ادعا کړې وه چې د تحریک انصاف ګوند د پلان شوي لاریون پر مهال د امنیتي ستونزو د رامنځته کېدو احتمال موجود و.
خو د کورنۍ غړو د هغوی توقیف غیرقانوني بللی او د خوشې کېدو غوښتنه یې کړې وه.
علیمه خان لا هم په زندان کې ده
د عمران خان خویندې ټولې نه دي خوشې شوې؛ درېیمه خور یې، علیمه خان، لا هم په زندان کې ده.
عمران خان د ۲۰۲۳ کال له اګست راهیسې بندي دی. نوموړی پر ځان لګېدلي تورونه سیاسي بولي، خو د پاکستان حکومت دا ادعا ردوي.
د عمران خان خویندې په وروستیو میاشتو کې د هغه د خوشې کېدو لپاره په سیاسي فعالیتونو کې برخه اخیستې ده.
