د قطر او ترکمنستان د بهرنیو چارو وزیرانو د دوحې په غونډه کې د سیمې پر امنیت، اقتصادي پرمختګ او د افغانستان پر وضعیت خبرې کړې دي. په دې لیدنه کې د ترکمنستان-افغانستان-پاکستان-هند (تاپي) د ګازو پایپ لاین د سرحدآباد-هرات برخې جوړولو پر اهمیت هم ټینګار وشو.
د قطر د بهرنیو چارو وزارت اعلان وکړ چې شیخ محمد بن عبدالرحمن آل ثاني د یکشنبې په ورځ، د کب ۲۶مه، په دوحه کې د ترکمنستان د بهرنیو چارو له وزیر رشید مردوف سره ولیدل.
د قطر د بهرنیو چارو وزارت د بیان له مخې، دواړو خواوو د انرژۍ، پانګونې او ټرانسپورټ په برخو کې د دوه اړخیزو همکاریو د پراختیا په اړه خبرې وکړې.
د ترکمنستان رسنیو راپور ورکړی چې په دې غونډه کې په ځانګړې توګه د تاپي پایپ لاین د سرحدآباد-هرات برخې پر جوړولو ټینګار وشو، او د قطر د بهرنیو چارو وزیر د ترکمنستان له هڅو ستاینه وکړه.
د تاپي ګازو پایپ لاین، چې د سیمې له لویو پروژو څخه ګڼل کېږي، ۱۸۱۴ کیلومتره اوږدوالی لري، چې له دې څخه ۲۱۴ کیلومتره په ترکمنستان، ۷۷۴ کیلومتره په افغانستان او ۸۲۶ کیلومتره په پاکستان غځېدلی دی.
د ترکمنستان ولسمشر سږ کال د دې پایپ لاین د جوړولو د بهیر د چټکتیا امر کړی دی
