په افغانستان کې د قطر سفیر مردف القاشوطي د افغانستان د ملي ارشیف د لیدنې پر مهال د تاریخي اسنادو، خطي نسخو او فرهنګي آثارو د ساتنې او بیارغونې په برخه کې د همکارۍ او ملاتړ ژمنه وکړه.
د اطلاعاتو او کلتور وزارت ویلي، د قطر سفیر د پنجشنبې په ورځ د افغانستان ملي ارشیف ته ولاړ او هلته یې د ارشیف بېلابېلې څانګې او ساتل شوې تاریخي نسخې ولیدلې.
د قطر سفیر د تاریخي اسنادو پر ساتنه ټینګار وکړ
د ملي ارشیف تخنیکي کارکوونکو مردف القاشوطي ته د افغانستان د مهمو تاریخي اسنادو، خطي نسخو او لرغونو فرهنګي آثارو په اړه معلومات وړاندې کړل.
د افغانستان د ملي ارشیف مسوولینو ویلي، په دې اداره کې زرګونه مهم تاریخي اسناد او نسخې ساتل کېږي، چې ډېری یې د بیارغونې او ځانګړې ساتنې اړتیا لري.
د ملي ارشیف مشر عبیدالله حنیف ویلي، د افغانستان فرهنګي میراث د هېواد د تاریخي هویت مهمه برخه ده او د ساتنې لپاره یې نړیوالو همکاریو ته اړتیا شته.
د افغانستان او قطر فرهنګي اړیکې پراخېږي
د قطر سفیر او افغان چارواکو د لیدنې پر مهال د دواړو هېوادونو ترمنځ د فرهنګي همکاریو پر پراختیا هم خبرې کړې دي.
دواړو لوریو ټینګار کړی چې د تاریخي او فرهنګي ارزښتونو ساتنه د هېوادونو ترمنځ د فرهنګي اړیکو د پیاوړتیا لپاره مهمه ده.
کارپوهان وایي، د افغانستان د تاریخي اسنادو او فرهنګي آثارو ساتنه نه یوازې د هېواد د تاریخي هویت لپاره مهمه ده، بلکې د راتلونکو نسلونو لپاره هم ارزښتناک میراث بلل کېږي.
