اړوند خبرونه:
د طالبانو اعلامیه: د هند او پاکستان تر منځ زیاتېدونکی کړکېچ د اندېښنې وړ دی
هند پر پاکستان د «سندور» عملیات پیل او ۹ سیمې یې په نښه کړي
کشمیر کې د تاوتریخوالي له امله، له هند سره د افغانستان سوداګري په ټپه ودرېده
اسلام اباد: “هند به په راتلونکو څو ساعتونو کې پر پاکستان برید وکړي”
امیر خان متقي وايي، رسمیت پېژندنه د فشار په توګه کارول کېږي
هندي رسنیو د رسمي سرچینو په حواله ویلي، حکومت یې په کابل کې د خپل سفارت د چارو د پرمخ وړلو لپاره «کرن یاداو» د نوي شارژدافیر په توګه ټاکلی دی. دا ګام په داسې حال کې اخیستل شوی چې څو ورځې مخکې د هند د بهرنیو چارو وزارت اعلان وکړ، له کابل سره خپلې اړیکې یې د سفارت په کچه لوړې کړې دي.
دغه پرېکړه د دې څرګندونه کوي چې هند غواړي له اسلامي امارت سره خپلې اړیکې د واقعي اړتیاوو او سیمهییزو ګټو له مخې عادي کړي، که څه هم تر اوسه یې د اسلامي امارت رسمي پېژندنه نه ده اعلان کړې.
د امیرخان متقي سفر او د اړیکو پراختیا
د افغانستان د اسلامي امارت د بهرنیو چارو وزیر امیرخان متقي، د هند د سفر پر مهال د دې هېواد له لوړ پوړو چارواکو، د سوداګرو ټولنو او د دیوبند دیني مدرسې له مسوولینو سره کتنې وکړې. هغه ویلي وو چې د نوی ډیلي او کابل اړیکې به په ډېرو برخو کې پراخه شي.
د متقي څرګندونې ښيي چې دواړه لوري غواړي خپله اړیکه له انساني مرستو او بشري تماسونو نه، بلکې د اقتصادي او سیاسي همکارۍ پله ته بوځي.
د هند هدفونه او سیاسي محاسبه
هند له تاریخي پلوه د افغانستان یو مهم سیمهییز شریک پاتې شوی، خو د ۲۰۲۱ کال وروسته یې ډیپلوماتيکې اړیکې تر ډېره کچه کنګل شوې وې. اوسنی ګام ښيي چې نوی ډیلي د افغانستان په اړه له عملي او ژورې محاسبې وروسته د تدریجي تعامل پالیسي غوره کړې ده.
هند غواړي د منځنۍ اسیا، چین او پاکستان تر منځ د خپلو ستراتیژیکو ګټو د خوندیتوب لپاره په کابل کې حضور ولري.
دغه حضور به هند ته دا زمینه برابره کړي چې په افغانستان کې د پراختیایي پروژو او بشري کمکونو چوکاټ له نږدې وڅاري.
دا تصمیم همدارنګه د هغو هېوادونو د سیاست دوام ښکاره کوي چې له اسلامي امارت سره د بشپړې رسمي پېژندنې له اعلان پرته، د تماسونو عملي لاره غوره کوي.
د پېژندنې مسله او احتمالي راتلونکی
که څه هم هند لا هم اسلامي امارت په رسمي توګه نه دی پېژندلی، خو ځینې سیمهییز کارپوهان باور لري چې هند ښايي د روسیې وروسته دویم هېواد وي چې دا ګام واخلي. دلیل یې دا دی چې هند په افغانستان کې د ثبات د دوام او د ترهګرۍ ضد ستراتیژۍ لپاره تعامل اړین ګڼي.
د نوي شارژدافیر ټاکنه ښيي چې هند غواړي د خپل نفوذ له بیا فعاله کولو سره د افغانستان د راتلونکو سیاسي ترتیباتو برخه پاتې شي. دا به نه یوازې د افغان-هندي اړیکو بنسټ پیاوړی کړي، بلکې د جنوبي اسیا د ځواک توازن ته هم نوې بڼه ورکړي.
