د لومړي وزیر «نریندرا مودي» په مشرۍ د هند کابینې نن (چهارشنبې، د ثور ۱۰مه) بیړنۍ غونډه کړې چې له مخې یې د دوی تر ولکې لاندې کشمیر په «پهلګام» کې تر خونړي برید وروسته د هند پر پوځي اقدام بیاکتنه وکړي.
د هند تر ولکې لاندې کشمیر کې پر سیلانیانو د خونړي برید له امله لږ تر لږه ۲۶ کسان ووژل شول او هندي چارواکو پاکستان د هغو بریدګرو پر ملاتړ تورن کړی دی.
دا د کشمیر له برید وروسته د هند د کابینې لومړۍ غونډه وه چې د دې عمل په غندلو او د قاطع غبرګون د پلان په اړه پکې خبرې شوې دي.
په دې غونډه کې د هند کابینې د «پاکستان لخوا تمویل شوې ترهګرۍ» پر وړاندې د پرېکنده اقدام پر اړتیا ټینګار شوی.
د ټایمز اف انډیا ورځپاڼې راپور ورکړی چې کابینې د سیند د اوبو تړون ځنډول، له پاکستان سره د اصلي سرحدي لارې تړل او له پاکستان سره د ډیپلوماټیکو اړیکو پرېکول تصویب کړي دي.
په هند کې د نریندرا مودي په مشرۍ د کابینې غونډې پر مهال، هاخوا پاکستاني چارواکو د خپلو سرچینو په حواله ادعا کړې چې هند به په راتلونکو ۳۶ ساعتونو کې پر پاکستان برید وکړي.
