د هند مرسته د افغانستان د روغتیايي سکټور سره دوام لري؛ تازه دغه هېواد د عامې روغتیا وزارت ته د کزاز او دیفتري ضد (Td) واکسین ۱۳۱ کارتنه وسپارل. د دې مرستې جزیات دلته ولولئ.
د هند هېواد د خپلو بشري همکاریو او له افغانانو سره د روغتیايي ملاتړ په دوام، یو ځل بیا د افغانستان له عامې روغتیا وزارت سره نوې مرسته وکړه. د هند مرسته دا ځل د ۱۳۱ کارتنه «ټيډي» (Td) واکسینونو په بڼه ده، چې په رسمي ډول افغان لوري ته وسپارل شول.
د واکسین جزیات او اهمیت
د عامې روغتیا وزارت د معلوماتو له مخې، په دغو ۱۳۱ کارتنو کې په لوړه کچه دوزونه شامل دي؛ په هر کارتن کې ۷۶۸ دوزه واکسین ځای پر ځای شوي دي. دغه واکسینونه د هېواد په کچه د وقایوي واکسیناسیون د پیاوړتیا او د روغتیايي خدمتونو د ښه والي په موخه کارول کېږي.
دا واکسین چې د دیفتري او کزاز ناروغیو له ګډ ترکیب څخه جوړ شوی، په هره ویال (بوتل) کې ۱۰ ډوزه لري. د دغو واکسینونو د تولید نېټه د ۲۰۲۵ کال اګسټ میاشت او د انقضا یا پای نېټه یې د ۲۰۲۸ کال جولای میاشت ښودل شوې ده. په روغتیايي برخه کې د هند مرسته د داسې ناروغیو په مخنیوي کې خورا ګټوره ثابتېدای شي چې مخنیوی یې یوازې د واکسین له لارې شونی دی.
د همکاریو دوام
د یادونې وړ ده چې د هند مرسته یوازې په واکسینونو پورې محدوده نه ده؛ څو اوونۍ وړاندې هم دغه هېواد د افغانستان له روغتیايي سکټور سره شاوخوا ۹.۵ ټنه د سرطان ضد درملو مرسته کړې وه. د هند حکومت تېرو کلونو کې هم په ځلونو له افغانستان سره د درملو، غنمو او نورو بشري توکو مرستې کړې دي.
د افغانستان د عامې روغتیا وزارت مسوولینو د دغې همکارۍ مننه کړې او زیاته کړې یې ده چې دا ډول مرستې کولی شي د هېواد په لیرې پرتو سیمو کې د مړینې کچه کمه او د ماشومانو او میندو روغتیا خوندي کړي. داسې ښکاري چې د هند مرسته به په راتلونکي کې هم د روغتیا او نورو بشري برخو کې دوام ولري.
