د افغانستان په ګڼو سیمو کې د ورښتونو او سیلونو وړاندوینه شوې ده

تېر کال هم په هېواد کې د ګڼو سیلابونو له امله په یو شمېر هېوادونو کې خلکو ته درانه مالي زیانونه اوښتي وو.

په افغانستان کې د سېلابونو د راوتو پر مهال د خلکو د ژغورنې یا هغوی ته د بېړنیو مرستو د رسولو لپاره د یو ځانګړي سیسټم نشتوالی ددې لامل دی چې خلکو ته زیات مالي او ځاني زیانونه اوړي.

اوس د ترانسپورت او هوايي چلن وزارت د هوا پېژندنې ریاست نن، سبا او بل سبا د افغانستان په ۱۲ ولایتونو کې د باران او سېلونو اټکل کړی دی.

په سیندیزو حوزو کې د اوبو زیاتوالی

د اوبو او انرژۍ وزارت هم په یادو ۳ ورځو کې (د روانې لړم/ عقرب له ۱ څخه تر ۳مې پورې) د هېواد د سیندیزو حوزو په ځینو ځایونو کې د تېزو بارانونو، د اوبو د کچې د لوړوالي او د سېلونو اټکل کړی دی.

د دغه وزارت په خبرپاڼه کې راغلي چې د ناڅاپي اورښتونو او سېلابونو د راوتلو ډېر اټکل د (امو، شمال او کابل) په سیندیزو حوزو کې شوی دی.

نور ولولئ:   په افغانستان کې د درنې واورې اورېدو له امله ځینې لارې تړل شوي

نور ولولئ: طالبان: افغانستان کې درنې واورې ۹کسان مړه کړي

په خبرپاڼه کې همداراز ویل شوي چې د سېلونو او اوبو د کچې لوړوالی په ځانګړې توګه د (بدخشان، تخار، بغلان، بامیان، سمنګان، بلخ، سرپل، پنجشېر، غوربند، کونړ، لغمان، ننګرهار، کابل او لوګر) سيندونو پر لاره او ذکر شویو ځایونو په ځینې خوړونو کې شته.

خلکو ته خبرداری ورکول

دې وزارت په همدې اساس له ټولو هغو هېوادوالو څخه چې د یادو سیندونو پر غاړو هستوګن دي، غوښتي چې د سیل د راتلو په صورت کې د سیند په غاړه او هغه خلک چې په لاندېنیو سیمو کې ژوند کوي خبر کړي.

تر دې مخکې د هواپېژندنې ادارې پرون په یوه خبرپاڼه کې ویلي و چې په کونړ، ننګرهار، سمنګان، بامیان، بلخ، کندوز، جوزجان، سرپل، فاریاب، غور، بادغیس او هرات ولایتونو کې سبا (سې شنبې) د نسبتاً شدید باران، بریښنا او ناڅاپي سېلونو احتمال شته.

د خبرپاڼې پر اساس، په لوړو او سړو سیمو کې د واورې د اورېدو وړاندوینه هم شوې ده.

په دې وروستیو کې په ننګرهار او کونړ کې بارانونو او سېلونو خلکو ته د سرومال زیانونه واړول.

له بلې خوا، له دې سره، سره چې خلکو ته د سېلابونو له راوتو وړاندې خبر ورکول کېږي، خو بیا هم خلک بې غوري کوي او ځانونه، نه خوندي کوي.