ډاکټر پزشکیان په دغه ټاکنو کې ۵۳ عشاریه درې رایې وړي چې له امله یې د ایران ولسمشر وټاکل شو
د ایران ټاکنو ادارې د ولسمشریزو ټاکنو د ټولو ۳۰ میلیون کارول شویو رایو له شمېر وروسته وویل، مسعود پزشکیان دا ټاکنې ګټلې دي.
د ایران ټاکنو ادارې د شمېرو له مخې اصلاحات غوښتونکي ډاکتر پزشکیان په دې ټاکنو کې ۵۳ اعشاریه درې او سخت دریځي سیال یې سعید جلیلي ۴۴ اعشاریه درې سلنه رایې ترلاسه کړې دي.
د ټاکنو دا دویم پړاو له هغه وروسته ترسره شو، چې د جون پر ۲۸مه د ولسمشریزو ټاکنو په لومړي پړاو کې هېڅ یو کاندید و نه توانېد غوڅ اکثریت ترلاسه کړي.
د خلکو له لوري د نوموړي د بریا نمانځل
د ایران ټاکنو دویم پړاو د پایلو له اعلان وروسته د مسعود پزشکیان ګڼو پلویانو د ایران د ښارونو په واټونو کې د هغه بریا ولمانځله.
د هغه ټاکنه ښايي اوس هغو ځوانانو ته نوې هيلې ورکړي چې د هېواد د وضعيت د ښه والي په اړه يې هيلې له لاسه ورکړې وې او د کډوالۍ په فکر کې وو.
نور ولولئ: د ایران ولسمشر او بهرنیو چارو وزیر په سقوط شوي چورلکه کې مړه شوي
نور ولولئ: ایران د افغانستان د کانونو د لوټلو په هڅه کې
دوی تمه لري، نوی ولسمشر به وکولای شي، چې دغه هېواد په ژورو کې د ډوبېدو مخه ونیسي.
ښاغلي پزشکیان ژمنه کړې، چې له امریکا او لویو ځواکونو سره به د بندیزونو د لېرې کولو لپاره خبرې پیل، د اجباري حجاب په اړه د کړکېچ مخه به ونیسي، د انټرنېټ فلټر کولو چاره به پای ته ورسوي، او د تعامل او سوداګرۍ لپاره به د خپل هېواد دروازې پرانېزي.
خو دا معلومه نه ده چې ښاغلی پزشکیان به تر کومه حده عملي ازادي ولري. ښايي سخت دریځي او توندلاري به د هغه په لار کې خنډونه رامنځته کړي.
په ملګرتیا کې مې یوازې مه پرېږدئ
د ایران نوي ولسمشر مسعود پزشکیان پر خپله اېکس (پخواني ټوېټر) د ولسمشرۍ په ټاکنو کې بریا “د ملګرتیا پیل” بللی دی.
نوموړي لیکلي: “د ایران خلکو، ټاکنې پای ته ورسېدې او دا یوازې زموږ د ملګرتیا پیل دی.” ستاسو له ملګرتيا، خواخوږۍ او باور پرته به مخ ته پرته سخته لار، اسانه نه وي. زه تاسو ته د مرستې لاس اوږدوم او يوازې مو نه پرېږدم، تاسې هم ما یوازې مه پرېږدئ.”
د ښاغلي پزشکیان د لوړې مراسم به د اګست په لومړۍ نیمايي کې ترسره شي.
د لوړې له مراسمو مخکې باید د منتخب ولسمشر د ولسمشرۍ فرمان د علي خامنه اي له خوا ورکړل شي.
په ایران کې ولسمشریزې ټاکنې له هغه وروسته اعلان شوې، چې په مې میاشت کې د دې هېواد مخکینی ولسمشر ابراهیم رئیسي د چورلکې غورځېدو په یوه پېښه کې ووژل شو.
