اړوند خبرونه:
متحده عربي اماراتو په ۲۲۳ سیالو شاخصونو کې په نړیواله کچه لومړی مقام خپل کړ
د متحده عربي اماراتو بهرنۍ مرستې له ۱۹۷۱ راهیسې ۳۶۰ ملیارد درهمو ته ورسېده
د افغانستان انټرنیشنل انګلیسي څانګې ته په کابل کې د طالبانو یوې امنیتي سرچینې ویلي، چې متحده عربي امارات به د پاکستان او طالبانو تر منځ د وروستیو بې باوریو د له منځه وړلو لپاره منځګړیتوب وکړي.
دغه سرچینې ویلي چې د طالبانو لوړپوړي امنیتي مشرانو هم هیله ښوولي چې د ای ایس ای له مشر سره وویني او خبرې ورسره وکړي.
د طالبانو د کورنیو چارو وزیر سراج الدین حقاني او د استخباراتو لوی ریاست رئیس عبدالحق وثیق د سه شنبې په ورځ په ناڅاپي سفر متحده عربي اماراتو ته لاړل او د هغه هېواد د دولت له رئیس شیخ محمد بن زاید ال نهیان سره یې ولیدل.
د امنیتي سرچینې په وینا، په ابو دوبۍ کې له شیخ محمد سره د طالبانو ددغه لوړپوړي امنیتي پلاوي موخه د پاکستان او طالبانو تر منځ د متحده عربي اماراتو د دولت منځګړیتوب دی.
د طالبانو له دغه لوړپوړي هئیت مخکې د اماراتو د دولت رئیس شیخ محمد د پاکستان له صدراعظم شهباز شریف سره هم لیدلي و.
اسلام اباد طالبان د تحریک طالبان پاکستان یا ټي ټي پي پر ملاتړ تورنوي، خو طالبانو تل د پاکستان دغه ادعا رد کړي او ویلي یې دي چې داد پاکستان کورنۍ ستونزه ده.
طالبانو همدارنګه پاکستان تورنوي چې په بلوچستان او پښتونخوا کې ددوی د رژیم پرضد داعش ډله روزي تر څو افغانستان ناامنه کړي.
د یادونې وړ ده چې په پاکستان کې ورځ تر بلې امنیتي حالت مخ پر خرابېدو دی.
