د پاکستان دفاع وزیر خواجه اصف تازه ویلي چې پر پاکستاني پوځ حملې په افغانستان کې تنظیمیږي
افغانناو، کابل: د افغانستان لپاره د پاکستان ځانګړي استازي دراني وروسته د پاکستان دفاع وزیر خواجه اصف وايي، د پاکستان پر پوځ او نورې حملې د افغانستان په خاوره کې تنظمیږي او سرچینه یې له هغه ځایه ده.
په وزیرستان کې د ۷ پاکستاني پوځیانو له وژل کېدو وروسته د دغه هیواد دفاع وزیر خواجه اصف وویل، په پاکستان کې حمله کوونکي د افغانستان له خاورې کار اخلي.
خواجه اصف په سیالکوټ کې له رسنیو سره په خبرو کې وویل:«زموږ پر ضد تروریزم عموماً د افغانستان له خاورې سرچینه اخلي.»
پر افغان طالبانو د پاکستان د تورونو دوام
پاکستان عموماً دا ډول تورونه پورې کوي خو د طالبانو حکومت وايي چې هیچا ته اجازه نه ورکوي چې د افغانستان له خاورې د بل هیواد پر ضد کار واخلي.
پاکستان وايي، طالبانو ټي ټي پي ته یې اجازه ورکړې چې د افغانستان په خاوره کې پناه واخلي او له هغه ځایه پاکستان ته د حملو لپاره پر ډیورند کرښه واوړي.
نور ولولئ: پاکستان کې ناامني؛ لوی درستیز یې وروستیو پېښو کې افغانان ښکېل وبلل
نور ولولئ: تحریک طالبان پاکستان: موږ له اسلام اباد سره په مذاکراتو باور نه لرو
نور ولولئ: تحریک طالبان پاکستان په فبرورۍ کې ۱۷۲ پاکستاني پوځیان او پولیس وژلي
پرون په شمالي وزیرستان کې د پاکستان د پوځ پر یوه مرکز په برید کې د دوو افسرانو په ګډون د پاکستان لږترلږه ۷ پوځیان ووژل شول او ۱۷ نور ژوبل شول.
خواجه اصف ادعا وکړه چې د حمله کوونکو، چې ده ترهګر وبلل، د ځینو همکارانو څرک یې لګولی او دا موضوع یې د طابلانو له حکومت سره شریکه کړې ده.
له ټي ټي پي د اسلام اباد اندېښنه
له دې جلا د افغانستان لپاره د پاکستان ځانګړی استازی اصف علي درانی ادعا کوي چې په افغانستان کې د ټي ټي پي د غړیو شمېر د ۵ زرو او ۶ زرو ترمنځ دی.
ده پرون په اسلام اباد کې په یوه غونډه کې همداراز وویل چې هند د ټي ټي پي مالي ملاتړ کوي.
اصف علي دراني، بې له دې چې کوم ثبوت وړاندې کړي وویل چې پاکستان له ټي ټي پي څخه د هند د ملاتړ ثبوتونه لري.
پاکستان د افغان طالبانو په منځګړتوب څو ځلې له ټي ټي پي سره خبرې وکړې خو د دوی خبرې بریالۍ نه شوې.
ښاغلي دراني وویل له ټي ټي پي سره خبرې ځکه بریالۍ نه شوې چې دا ډله د پاکستان اساسي قانون نه مني او وسله پر مځکه نه ږدي.
د یادونې وړ ده، ټي ټي پي او بلوڅ ازادي غوښتونکو د پاکستان پر پوځ وسله وال بریدونه زیات کړي دي او د پاکستان نظامي دستګاه ته یې ګڼه مرګ ژوبله ور اړولي ده.
