اړوند خبرونه:
د پاکستان پوج: کراچۍ کې مو د ټي ټي پي خطرناکه اوولس کسیز ګروپ نیولی
خواجه اصف: د ټي ټي پي پرضد “عزم استحکام” عملیات د افغانستان خاورې ته غځوو
د افغانستان لپاره د پاکستان ځانګړی استازی کابل ته ورسېده
د پاکستان حکومت خبر ورکړی چې د دې هېواد د بهرنیو چارو وزیر به د افغانستان د سرپرست حکومت سره د اړیکو د ښه کولو او د دواړو هېوادونو ترمنځ د مسائلو د حل په موخه د شنبې په ورځ د یوه لوړ پوړي پلاوي په مشرۍ کابل ته سفر وکړي.
د افغانناو د راپور له مخې، د پاکستان د کورنیو چارو مرستیال وزیر طلال چودري نن په اسلامآباد کې په یوه خبري کنفرانس کې وویل چې سناتور محمد اسحاق ډار، د پاکستان د صدراعظم مرستیال او د بهرنیو چارو وزیر به ډېر ژر افغانستان ته سفر وکړي.
هغه څرګنده کړه چې د افغان اتباعو د بېرته ستنولو د بهیر د ځنډولو لپاره هېڅ پرېکړه په اجنډا کې نشته او د پاکستان څخه د ټولو غیرقانوني بهرنیو اتباعو د ایستلو بهیر به دوام ولري.
د پاکستان د کورنیو چارو مرستیال وزیر زیاته کړه: اسلامآباد په صادقانه توګه د افغانستان سره د اړیکو د ښه کولو او د ټولو مسائلو او اندېښنو د حل په لټه کې دی.
هغه وویل: د روان کال د اپرېل له لومړۍ نېټې څخه تر نن پورې له ۸۶ زرو څخه زیات افغانان پاکستان پرېښی دی او د پاکستان چارواکي ژمن دي چې افغان اتباع په درناوي او اسانه توګه بېرته ستانه کړي.
چودري زیاته کړه: د افغان اتباعو د بېرته ستنولو د پلان له پیل راهیسې، له ۹۰۷ زرو څخه زیات افغانان خپل هېواد ته ستانه شوي دي.
د پاکستان د بهرنیو چارو وزارت هم څو شېبې وړاندې په یوه اعلامیه کې اعلان وکړ چې د دې هېواد د بهرنیو چارو وزیر به سبا (شنبه) کابل ته سفر وکړي او د سرپرست حکومت له صدراعظم، د صدراعظم له مرستیال او د طالبانو د بهرنیو چارو له سرپرست وزیر سره به وګوري.
په دې اعلامیه کې راغلي: دا سفر د افغانستان د ورور هېواد سره د دوامداره تعامل د زیاتولو لپاره د پاکستان د ژمنتیا څرګندونه کوي.
