اړوند خبرونه:
ډبلیو ایف پي: یو میلیون افغانانو ته د مرستو رسولو لپاره ۱۶ میلیونه ډالرو ته اړتیا ده
ډبلیو ایف پي: څلور میلیونه افغان مېندې او ماشومان پر خوارځواکۍ اخته دي
دپیسو نړیوال صندوق (IMF) افغانستان ته خپلې مرستې ځنډولې دي، ځکه چې د دغه صندوق په وینا په دغه هېواد کې سیاسي ناڅرګندتیا ورځ تر بلې ډېریږي.
دا خبره هغه مهال څرکنده شوه چې د پیسو نړیوالې بسپنې (صندوق) تازه د ۶۵۰ میلیارد ډالرو په ارزښت ځانګړې اختصاصي حقوق (SDR) د خپلو غړو هیوادونو لپاره اعلان کړل، خو افغانستان په دې وخت کې د دغو مرستو د ترلاسه کولو اجازه نه لري.
د پیسو د نړیوالې بسپنې ویندوی جېري رایس د پنجشنبې په ورځ په یوه خبري ناسته کې وویل چې افغانستان دې مرستې ته لاسرسی نه لري، ځکه چې د افغانستان د حکومت په اړه لاهم نړیواله ناڅرګندتیا شته.
هغه زیاته کړه: «زموږ اړیکې له افغانستان سره تر هغه وخته ځنډول شوي چې د حکومت د رسمیت پېژندنې په اړه د نړیوالې ټولنې له لوري وضاحت رامنځته شي. زموږ لارښوونه د نړیوالې ټولنې پرېکړې کوي، او موږ اوس داسې څه نه لرو.»
رایس وویل، له همدې امله د پیسو د نړیوالې بسپنې پروګرام په افغانستان کې ځنډول شوی دی.
هغه زیاته کړه: «لکه څنګه چې ما تېره میاشت وویل، افغانستان دا مهال د IMF سرچینو ته لاسرسی نه لري، نه د SDR او نه نورو مرستو ته. خو یو ځل بیا وایم چې موږ چمتو یوو له نړیوالې ټولنې سره کار وکړو تر څو د احتمالي بشري ناورین د مخنیوي لپاره عاجل اقدامات وشي.»
هغه ټینګار وکړ چې د پیسو نړیواله بسپنه د افغانستان د سخت اقتصادي او بشري وضعیت له امله ژوره اندېښمنه ده.
د نیویارک پوسټ د راپور له مخې، د طالبانو د واکمنۍ له پیلېدو (د اګست ۱۵ مه) وروسته، افغانستان ته بهرنۍ مرستې سمدستي کنګل شوې. د دې ترڅنګ، د امریکا متحدوایالتونو د افغانستان بانک ۹.۴ میلیارده ډالره زېرمه هم کنګل کړه.
سربېره پر دې، د پیسو نړیواله زېرمه او نړیوال بانک خپل پورونه بند کړل، او د مالي شفافیت د څار ځانګړې ادارې (FATF) پر خپلو ۳۹ غړو هېوادونو غږ وکړ چې د طالبانو شتمنۍ کنګل کړي.
