اړوند خبر:
ایا مصنوعي ذهانت به د بشر د له منځه وړلو سبب شي؟
د اوپناېآی شرکت، چې د چټجيپيټي مصنوعي ځيرکتیا جوړوونکې ده، د سېشنبې په ورځ د تلې په ۲۹مه د اتلس (Atlas) په نوم د انټرنېټ یو نوی پلټونکی (براوزر) معرفي کړ، چې د دې شرکت د مصنوعي ځيرکتیا د وړتیاوو پر بنسټ کار کوي او د ګوګل کروم لپاره یو مستقیم سیال بلل کېږي.
د اوپناېآی اجرائیه مشر، سام آلټمن، د معرفۍ په ژوندۍ خپرونه کې وویل:
«دا د مصنوعي ځيرکتیا پر بنسټ جوړ شوی ویبپلټونکی دی، چې د چټجيپيټي په محور راڅرخي.»
اوپناېآی په وروستیو میاشتو کې هڅې زیاتې کړې دي څو د ګوګل سیالۍ ته دوام ورکړي، په داسې حال کې چې ګوګل هم د خپل لټون له انجن او نورو خدماتو سره د مصنوعي ځيرکتیا وړتیاوې یوځای کوي.
آلټمن او د ده د شرکت یو شمېر مشرانو د «ایجنټ مُوډ» (Agent Mode) په نوم یو نوی حالت معرفي کړ، چې په هغه کې چټجيپيټي کولای شي د کاروونکي پر ځای په انټرنېټ کې پلټنه وکړي.
د آلټمن په وینا، په دې حالت کې چټجيپيټي په خپلواکه توګه له براوزر څخه کار اخلي او د خپلې پلټنې پایلې کاروونکي ته وړاندې کوي.
هغه وویل:
«په دې حالت کې، چټجيپيټي ستاسو معلوماتو او ترتیباتو ته لاسرسی لري او خپله په ویب کې ګرځي. تاسو کولای شئ د دې پروسه ووینئ یا یې پرېنږدئ، خو مهمه دا ده چې دا ستاسو پر ځای له انټرنېټه کار اخلي.»
د آلټمن په وینا، اټلس براوزر له سېشنبې راهیسې د هغو کمپیوټرونو لپاره چې د اپل اپرایټنګ سیستم لري، کارېدلی شي، خو ایجنټ مُوډ به یوازې ناوړیا (پېسو ورکونکو) چټجيپيټي کاروونکو ته فعال وي.
هغه زیاته کړه:
«موږ غواړو دا براوزر هرڅومره ژر د وینډوز او موبایل وسایلو لپاره هم وړاندې کړو، خو لا تراوسه د وخت مشخص جدول نه لرو. دا پروژه لا هم د پرمختګ په لومړیو پړاوونو کې ده.»
هغه ځانګړتیاوې چې د اټلس د معرفۍ په ژوندۍ خپرونه کې وښودل شوې، له هغو ځانګړتیاوو سره ورته وې چې مخکې په ګوګل کروم او مایکروسافټ ایج براوزرونو کې موجودې وې.
له بلې خوا، د ټکنالوژۍ ستر شرکتونه — امازون، ګوګل، مېټا، مایکروسافټ او د ایلن مسک شرکت XAI — له هغه وخته راهیسې چې د چټجيپيټي لومړۍ نسخه د ۲۰۲۲ په وروستیو کې وړاندې شوه، په مصنوعي ځيرکتیا کې میلیاردونه ډالر پانګونه کړې ده.
اټلس براوزر په داسې وخت کې وړاندې شو، چې ګوګل خپل براوزر، کروم د امریکا د سیالۍ ضد له سترې قضیې څخه له انحلال وژغوره. خو سره له دې، قاضي د ځینو اصلاحاتي بدلونونو امر ورکړی چې اغېزې یې لا روښانه نه دي، په ځانګړي ډول اوس چې مصنوعي ځيرکتیا د لټون انجنونو لپاره یو جدي رقیب ګرځي.
قاضي امیت مهتا، چې تېر کال یې ګوګل په آنلاین لټون کې د غیرقانوني انحصار په ساتلو تورن کړی و، دا شرکت د کروم له خرڅلاو څخه معاف کړ، خو امر یې وکړ چې ګوګل باید خپله ډیټا له نورو شرکتونو سره شریکه کړي، څو هغوی هم وتوانېږي د خپل لټونانجنونه جوړ کړي.
د دې پرېکړې له مخې، ګوګل نور نه شي کولای د انحصاري تړونونو له لارې ځان د یوازیني لټونانجن په توګه د وسایلو یا خدماتو پر مخ وټاکي.
قاضي مهتا څرګنده کړه، چې له هغه وخته چې د امریکا د عدلیې وزارت او ۱۱ ایالتونو د ګوګل پر ضد د سیالۍ ضد قضیه پیل کړه (په ۲۰۲۰ کال کې)، د بازار وضعیت په پاموړ ډول بدل شوی دی.
