طالبان وايي، د کابل – کندهار د لویې لارې ټرافیکي پېښو کې ۴۴ کسان مړه او ۷۶ نور ټپیان دي
د کندهار او کابل تر منځ ترافیکي پېښې اکثره وخت ډېرې کېږي، خو پر طالبانو نیوکه داده چې دوی په اوس وخت کې یوازې لیسانسونه ویشي، او شرایط یې په پام کې نه نیول کېږي.
په غزني ولایت کې د طالبانو د اطلاعاتو او فرهنګ ریاست وایي، چې د کابل – کندهار د لویې لارې په ټرافیکي پېښو کې د مړو شویو کسانو شمېر ۴۴ او د ټپیانو ۷۶ ته لوړ شوی دی.
دغه پېښه کله رامنځته شوې ده؟
دغه پېښې تېره شپه شاوخوا ۱۱بجې د کابل- کندهار په لویه لار د غزني مرکز شهباز او اندړو ولسوالۍ ناني سیمه کې رامنځته شوې وې.
د طالبانو تر کنټرول لاندې باختر اژانس یو ساعت وړاندې د مړو شمېره ۵۵ خپره کړه وه؛ خو اوس یې له اېکس پاڼې خپله دغه لیکنه لرې کړه ده.
په هغې لیکنه کې په غزني ولایت کې د طالبانو د اطلاعاتو او فرهنګ مشر حمید الله نثار په حوالې راغلي و، چې لومړنۍ پېښه د اندړو ولسوالۍ په ناني سیمه کې د ۵۸۰ ډوله مسافر وړونکي او بار وړونکي موټر د ټکر له امله شوې ده.
نور ولولئ: تخار: په ترافیکي پیښه کې ۱۳ کسان وژل شوي او ۵ نور ژوبل شوي
نور ولولئ: افغانستان کې، تېرو ۶ میاشتو کې ۱۲ سوه کسان ترافیکي پېښو کې مړه شوي
هغه ویلي و، په دغې پېښه کې ۳۰ تنه مړه شوي دي.
هغې لیکنې وړاندې کاږلي و، په دویمه پېښه کې چې د غزني ښار مرکز اړوند شهباز سیمه کې د ۵۸۰ ډوله باروړونکي موټر او د تېلو د ټانکر تر منځ رامنځته شوې په کې ۲۵ تنه مړه شوي دي.
د ځینو کسانو وضعیت د اندېښنې وړ دی
هغه زیاته کړې، په دواړو پېښو کې ټولټال ۷۶ کسان ټپیان شوي هم دي، چې د ځینو روغتیایي وضعیت د اندېښنې وړ ښودل شوی دی.
د ټپیانو نازک روغتیایي حالت ته په کتو، ښایي د مړو په شمېر کې زیاتوالی راشي.
تر دې وړاندې ځینو سرچینو ویلي و، چې مسوولانو کابل ته د ټپيانو د لېږدولو په موخه الوتکه ورغوښتې وه؛ خو د خرابې هوا له امله الوتکه وانه ستول شوه او ټپيان اوسمهال د ځمکې له لارې د کابل روغتونونو ته د لېږدولو په حال کې دي.
دا په داسې حال کې دي چې په بدخشان او ځینو نورو لویو لارو کې هم د خطرناکو ترافیکو پېښو خبرونه ورکول کېږي.
