افغانې ذکیه خدادادي د ۲۰۲۴ کال د پارالمپیک سیالیو خپل حریف ته په ماتې ورکولو د ژېړو مډال په نوم کړ
دغه افغان لوبغاړي داسې مهال بریا تر لاسه کوي چې په افغانستان کې د طالبانو په بیا واک ته رسېدو سره د نجونو او ښځو پر مخ د کار او زده کړو دروازې وتړلي، دوی یې له تفریحي ځایونو منع کړې او لا ډېر محدودیتونه یې ورباندې وضع کړل.
د لوبو په برخه کې هم افغان مېرمنې اجازه نه لري چې سپورټ وکړي او یا هم نړیوالو کې د ګډون اجازه ورکړل شي.
د ذکیه خدادادي لوبه
د افغانستان د تکواندو پخوانۍ لوبغاړې او د پارالمپیک د نړیوالې کمېټې د کډوالو ټیم غړې ذکیه خدادادي، د کیوبا او ترکیې لوبغاړو ته په ماتې ورکولو او لوبې ته د مراکشۍ لوبغاړې نه حاضرېدو سره د ژېړو مډال وګاټه.
ذکیه خدادادي د ازبکستان له لوبغاړې په لږ توپیر ۳-۴ ماتې وخوړه او د سپینو او سرو زرو مډال ګټلو چانس یې له لاسه ورکړ.
اغلې ذکیه د پاریس د پارالمپیک سیالیو کې د ۴۷ کیلو ګرامه کې لوبه کوله.
نور ولولئ | افغانستان په تکواندو کې په نړیواله کچه ۲۹ مقام خپل کړ
اغلې خدادادي د خپلې کیوبایۍ سیالې پر وړاندې د ۲۱ او ۲۱ په توپیر بریا ته ورسېده او د ترکیې لوبغاړې ته یې هم د نهو په مقابل کې په یوه امتیاز ماتې ورکړه.
د ذکیه خدادادي پیغام
ذکیه خدادادي چې د پاریس المپیک سیالیو پرانیستې مراسمو کې یې مشال لېږدولی، د میلیونونو افغان او نورو کډوالو په استازیتوب د ۲۰۲۴ کال پاریس پارالمپیک سیالیو د پاراتکوانډو برخه کې ګډون کړی دی.
ذکیه خدادادي د ۲۰۲۰ کال په توکیو المپیک سیالیو کې د افغان په استازیتوب ګډون کړی و، خو په افغانستان کې د طالبانو له واکمنېدو وروسته هېواد ته ستنه نه شوه او بیا یې وروسته په فرانسه کې د کډوالو ټیم غړیتوب ترلاسه کړ.
تېره ورځ د اسلامي همکاریو سازمان ځانګړي استازي د طالبانو د بهرنیو چارو وزیر امیرخان متقي سره په لیدنه کې له نوموړي غوښتي وو، چې افغان نجونو ته د زده کړو کولو حق ورکړي او بشري حقونو ته هم پام وساتي.
خو دا غوښتنې داسې مهال کېږي چې طالبانو د امربالمعروف د نوي قانون په تصویب او توشیح سره د ښځو حقوق او ازادي نوره هم محدوده کړه.
د افغان ملت او نړیوالو له غوښتنو سره سره بیا هم طالبان دې ته حاضر نه دي چې د ښځو پر وړاندې د ښوونځیو او پوهنتونونو دروازې پرانیزي او د کار کولو اجازه ورکړي.
