Uncategorized

روسیه: د اوکراین باخموت ښار مو نیولی؛ اوکراین وايي جګړه لا روانه ده

د روسیې اړوند واګنر وسله والې ډلې مشر یوګني پریګوژین وايي‌ د دغه هېواد بیرغ یې د اوکراین باخموت ښار کې راځړولی دی

ښاغلي پریګوژین په یوه ویډیويي پیغام کې چې تېره شپه خپور شو وویل چې باخموت اوس له حقوقي اړخه د روسیې په کنټرول کې دی.

نوموړی په دې ویډیو کې وايي روسي پوځي بلاګر ولادلین تاتارسکي ته په درناوي چې یکشنبه د سنټ پیټرزبورګ ښار یوه خوړنځي کې په چاودنه کې ووژل شو د هغه نوم پر دغه بیرغ لیکل شوی دی.

خو هغه په دې ویډیو کې دا هم منلې چې اوکرایني ځواکونه لا هم د دغه ښار لویدیزو څنډو کې مقاومت کوي.

اوکرایني چارواکي بیا دا ادعا په زغرده ردوي او وايي چې پوځ یې تر اوسه پر باخموت واکمن دی.

باخموت د اوکراین ختیځ کې پروت دی او روسیه یې له څو میاشتو راهیسې د نیولو لپاره خونړۍ جګړه کوي.

د اوکراین د پوځ لوی درستیز ویلي:”دښمن پر باخموت خپل بریدونه نه دي درولي. خو اوکرایني مدافعانو په زړورتیا سره ښار ساتلی او د دښمن ګڼ بریدونه یې شنډ کړي دي.”

د جګړې مطالعاتو موسسې د تجزیې او شننې له مخې تر یکشنبې د باخموت ستره برخه د اوکرایني ځواکونو په ولکه وه

په دغه تحلیل کې دا هم راغلي چې روسي ځواکونه هڅه کوي دا ښار د ختیځ او سویل له خواو کلابند کړي.‌

د دې موسسې په وینا د باخموت ښاروالۍ او ښاري شورا ودانۍ د دغه ښار د ختیځ هغې برخه کې دي چې روسیې یې په دې وروستیو کې د نیولو ادعا کړې.

واګنر شخصي امنیتي شرکت د باخموت نیولو لپاره جګړه کې درانه زیانونه ګاللي.‌

د واګنر اکثریت غړي هغه بندیان دي‌ چې د روسیې له زندانونو راخوشې او د دې ډلې د وسله والو شمېر لوړولو لپاره ګومارل شوي.

د باخموت ښار جګړه کې د روسیې او اوکراین دواړو زرګونه پوځیان وژل شوي خو اټکل دا دی چې د روسیې اړخ مرګژوبله د اوکراین په پرتله څو برابره لوړه ده

دغه ښار کوم ځانګړی ستراتېژیک اهمیت نه لري خو اوکراین ورته د روسیې د پوځي تجهیزاتو او بشري ځواک وچولو لپاره د مهم مرکز په سترګه ګوري.

د روسیې پوځي قوماندانان بیا هیله لري چې د باخموت نیول به ورته د نورو پرمختګونو دروازه پرانیزي.

د بریتانیا دفاع وزارت په ډسمبر میاشت کې ویلي وو چې د دغه ښار نیول روسیې ته تر ډېره دا فرصت ورکوي چې د کراماتورڅک او سلوویانڅک په څېر سترې ښاري سیمې وګواښي.

نور ولولئ: روسیې ته د امنیت شورا مشرۍ سپارل کېدو اوکراین غوسه کړی

د روسیې اړوند واګنر ډله داسې مهال باخموت کې د دغه پرمختګ ادعا کوي‌ چې ټاکل شوې اوکرایني ځواکونه په راتلونکو اوونیو کې له روسیې د اشغال کړو سیمو بېرته نیولو لپاره نوي عملیات پیل کړي.‌

اټکل دا دی چې دغه عملیات به اوکراین ته د لویدیځ لخوا د تازه تجهیزاتو له رسېدو وروسته پیل شي.

په دغو تجهیزاتو کې د جرمني لیوپارډ او د بریتانیا چلېنجر ټانکونه هم شامل دي.

افغان سالار

افغان سالار افغان سالار د لومړي لاس او کره معلومات تر تاسو درسوي. افغان سالار به تاسو ته د سیاست، ادب او کلتور، اقتصاد، روغتیا، سپورټ او نور په زړه پورې مطالب برابر او تر نورو به یې چټک درته وړاندې کوي.

اړوند خبرونه

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *

Back to top button