اړوند خبرونه:
کشمیر کې د تاوتریخوالي له امله، له هند سره د افغانستان سوداګري په ټپه ودرېده
اسلام اباد: “هند به په راتلونکو څو ساعتونو کې پر پاکستان برید وکړي”
د پاکستان او هند ترمنځ د کړکېچ پراخېدو په دوام، د روسیې د بهرنیو چارو وزیر «سرګئي لاوروف» د دواړو هېوادونو ترمنځ د ستونزو د حل لپاره پر دیپلوماتیکو لارو چارو ټینګار کړی او ویلي يې دي چې دوی باید له تاوتریخوالي لاس واخلي.
د پاکستاني رسنیو د راپورونو له مخې چې د روسیې د بهرنیو چارو وزیر دا خبرې له پاکستاني سیال «اسحاق ډار» سره په تلفون کړې دي.
په دې تلفوني خبرو کې د پاکستان د صدراعظم مرستیال او د بهرنیو چارو وزیر، اسحاق ډار یو وار بیا پر پاکستاني حکومت د هند تورونه بې اساسه بللي او ادعا یې کړې چې «پاکستان په سیمه کې د امنیت ټینګښت ته ژمن دی.»
د پاکستان د بهرنیو چارو وزیر دا خبرداری هم ورکړی چې که هند پوځي اقدام وکړي، پر پاکستان له خپلې خاورې دفاع حتمي ده.
د پاکستان او هند ترمنځ وروستی کړکېچ د هند تر ولکې لاندې کشمیر کې پر سیلانیانو له هغه خونړي برید وروسته پراخ شوی چې ۲۴ کسان پکې ووژل شول. هند له دغه برید وروسته په لومړي اقدام کې د ټولو پاکستاني وګړو پر ایستلو ټینګار کړی.
د ویلو ده چې د دغو دواړو هېوادونو په ځینو سرحدي سیمو کې د نښتې راپورونه هم ورکړل شوي دي.
