اوکرایني چارواکو رسنیو ته ویلي چې روسیې د پنجشنبې په ورځ د مارچ نهمه د هغه هیواد په بیلابیلو برخو کې د انرژۍ بنسټونه او د استوګنې یو شمیر ودانۍ په راکټونو ویشتلې دي
ویل کیږي د پلازمینې کیېف په ګډون د هغه هیواد په بېلابېلو برخو کې د پنجشنبې سهار وختي لږ تر لږه د پنځو ساعتونو سره د خطر زنګونه روښانه وو. دا د تېرو دریو اوونیو راهیسې د مزایلو لومړی پراخ برید بلل شوی.
اوکرایني رسنیو ویلي دي چې هوایي او دفاعي سیستم هم د هغه هېواد په څو برخو کې فعال شوی دی.
د خارکیف والي اولي سینیهبوف ویلي دي چې پر خارکیف ښار پر شمال شرقي سیمو پنځلس بریدونه شوي او د استوګنې یو شمیر ودانۍ هم لګیدلې دي.
نوموړي ویلي چې د اوکراین په دویم ستر ښار کې به د اوښتو زیانونو او مرګ ژوبلې په اړه مالومات خپاره کړي، هغه زیاته کړه:”مهم بنسټونه یو ځل بیا د یرغلګرو له خوا په نښه شوي دي.”
نور ولولئ: د برتانیې پر اوکراین د یرغل په صورت کې به روسیې سختو اقتصادی پایلو سره مخ شی
د اوکراین د جنوبي سیمې اودیسه والي ماکیسیان مارچینکو هم پر اودیسه د بریدونو خبر ورکړی او ویلي یې دي چې د انرژۍ بنسټونه او د استوګنې کورونه په نښه شوي دي.
مارچینکو پر ټلګرام لیکلي چې پر سیمه د مزایلو پراخ برید شوی، د هغه په بیان کې راغلي:”دویمه څپه اوس امکان لري، نو ځکه ما د سیمې له اوسیدونکو وغوښتل چې په سرپناوو کې واوسي.”
اسوشیټد پریس لیکي چې د پلازمینې کیېف اوسېدونکو ټوله شپه د خطر له زنګونو سره تیره کړه او د یوې لویې چاودنې غږ خلکو ته ټکان ورکړ خو تر اوسه دا معلومه نده چې پېښه چیرې شوې او کوم هدف په نښه شوی دی.
همدارنګه په شمالي ښار چیرنوهیف او غرپي لفیف او همدارنګه د دینپرو، لوټسک او ریون په ښارونو کې هم د چاودنو راپورونه ورکړل شوي دي.
روسیې د تیر کال د اکتوبر میاشتې راهیسې پر اوکراین د مزایلو بریدونه پیل کړي دي.
د اوکراین د بخموف ښار د سقوط احتمال
بلخوا د ناټو سرمنشي ینس سټولټنبرګ وایي چې ممکنه ده د اوکراین په ختیځ کې د بخموف ښار به له میاشتو نښتو وروسته په راتلونکو ورځو کې د روسي ځواکونو لاس ته ولویږي.
نوموړي په داسې حال کې د دې ښار د سقوط د احتمال خبره وکړه چې د روسیې د واګنر ګروپ پوځیان د جګړې په لومړۍ کرښه کې دي او ادعا یې کړې چې د دغه صنعتي ښار ختیځې برخې یې نیولي دي.
د واګنر ګروپ مشر او د کرملن متحد یفژیني پریګازاین د چهار شنبې په ورځ د مارچ په اتمه پر ټولنیزو رسنیو ولیکل چې ځواکونو یې د یاد ښار ټولې ختیځې برخې نیولې دي.
دې ښار د روسیې له نظامي برید مخکې ۸۰ زره نفوس درلود. د بخموف ښار جګړه په تیر یو کال کې تر ټولو خونړۍ جګړه بلل کیږي.
د ناټو سرمنشي هم اندیښنه څرګنده کړې
د ناټو سرمنشي په سویډن کې د اروپايي ټولنې د دفاع وزیرانو د غونډې پرمهال وویل روسیه سیمې ته ډیر ځواکونه استوي څو د کیفیت کموالی د کمیت په وسیله بشپړ کړي.
د ناټو سرمنشي وویل:”موږ دا موضوع رد کولی نشو چې بخموت ښار به بالاخره په راتلونکو ورځو کې سقوط ونه کړي.” خو هغه زیاته کړه چې د نوموړي ښار سقوط په دې مانا نه دی چې ګواکې د جګړې نتیجه تغیير کوي.
د اوکراین ولسمشر ولادمیر زیلنسکي له سيانان خبري شبکې سره په مرکه کې هم د یاد ښار له سقوط څخه خبرداری ورکړی دی.
