سرپل کې اووه تاریخي اثار وموندل شول او د ساتنې لپاره اړوندو ادارو ته وسپارل شول
د سرپل ولایت په سانچارک ولسوالۍ کې تاریخي اثار موندل شوي چې د سیمې اوسېدونکو له لوري د ساتنې په موخه د اطلاعاتو او کلتور ریاست ته سپارل شوي دي.
د سرپل د اطلاعاتو او کلتور ریاست چارواکي وایي، دغه تاریخي اثار د سانچارک ولسوالۍ د فرشقان کلان کلي له مربوطاتو څخه ترلاسه شوي او لومړنۍ ارزونې ښيي چې شاوخوا درې سوه کاله لرغونتوب لري.
په موندل شویو تاریخي اثارو کې څه شامل دي؟
د سرپل د اطلاعاتو او کلتور رئیس ملا عبدالغفار حقنما د باختر خبري اژانس ته ویلي چې په دغو اثارو کې یو دیګ، څراغ، شمعداني، یوه ماته دېګچه، د کفګیر د لاستي دوه ټوټې او یو شمېر نور لرغوني وسایل شامل دي.
د هغه په وینا، دغه توکي د سیمې یو شمېر ځوانانو هغه مهال په ناڅاپي ډول وموندل چې د مینا مرغانو په ښکار بوخت وو. وروسته یې موندل شوي اثار د کلي مسوولینو ته وسپارل او له هغه ځایه د سانچارک ولسوالۍ د چارواکو له لارې د اطلاعاتو او کلتور ریاست ته انتقال شول.
د تاریخي اثارو ساتنه د ملي میراث د خوندي کولو لپاره مهمه ده
د سرپل د اطلاعاتو او کلتور ریاست ټینګار کړی چې تاریخي اثار د افغانستان د فرهنګي هویت او تاریخي میراث ارزښتناکه برخه جوړوي او د هغوی ساتنه د دولت او خلکو ګډ مسوولیت دی.
چارواکي وایي، د ورته لرغونو توکو ثبت، ساتنه او مسلکي ارزونه کولی شي د هېواد د تاریخي شتمنیو په خوندي کولو او راتلونکو نسلونو ته د فرهنګي میراث په لېږد کې مهم رول ولوبوي.
