په قطر کې، د طالبانو سفیر سهیل شاهین وايي چې ایران او هند پخوا دا ګومان کاوه چې طالبان د پاکستان لاسپوڅي دي، خو اوس یې درک کړې چې دا اندېښنه ناسمه وه.
ښاغلي شاهین له الجزیرې سره په مرکه کې وویل، د سیمې هېوادونو د طالبانو واقعیت منلی او له دې ډلې سره تعامل یوه واقعبينه کړنلاره ده.
سهیل شاهین زیاته کړه، طالبان «د ننني افغانستان واقعیت» دی او د هېواد ټولې خاورې او پوله کنټرولوي.
هغه الجزیرې ته په خبرو کې همداراز وویل: «د سیمې هېوادونه دا حقیقت درک کوي، او له همدې امله له اسلامي امارت سره په بېلابېلو سطحو تعامل کوي، چې زما په اند یوه واقعبینانه او منطقي لاره ده.»
په قطر کې د طالبانو سفیر دا هم ویلي چې دوی باور لري له تعامل څخه د ستونزو حللارې راوتلی شي.
نوموړي استدلال وکړ چې د طالبانو د ادارې په رسمیت پېژندنه نور باید و نه ځنډول شي.
