رنګین دادفر سپنتا د افغانستان پخواني ولسمشر حالت د طالبانو د بندي په څېر بللی دی
طالبان کرزي ته بهر ته د تګ اجازه نه لري او څوک چې له حامد کرزي سره ملاقات کوي، نو هغه د طالبانو لخوا لېست کېږي او بیا ورته د ملاقات یا له کرزي سره د لیدو اجازه ورکول کېږي.
د پخواني ولسمشر حامد کرزي نږدې کس او د واکمنۍ پر مهال یې د ملي امنیت سلاکار او د بهرنیو چارو وزیر رنګین دادفر سپنتا په کابل کې د کرزي د ژوند او وضعیت په اړه تبصرې کړي.
هغه ویلي چې کرزی له څه باندې یوه کال راهیسې د طالبانو د بندي په شان کابل کې ژوند کوي.
بهر ته د تګ اجازه نه لري
د سپنتا په وینا، طالبان کرزي ته ان په بهرنیو هېوادونو کې د درملنې اجازه نه ورکوي او پر لیدنو- کتنو یې هم محدودیتونه لګول شوي.
هغه په دې اړه نور جزییات ورنه کړل او ویې نه ویل چې خپله یې کرزي سره اړیکې شته کنه؟
حامد کرزی د طالبانو له بیا واک ته رسېدو سره په کابل کې پاتې او خپله یې هم څو ځله پر ده د محدودیتونو خبر ورکړی.
نور ولولئ: کرزی د نجونو ښوونځي نه پرانیستل به هېواد ته ډېر زیان ورسوي
نور ولولئ: حامد کرزی: افغانستان کې باید نجونو ته د زدهکړو حق ورکړل شي
کرزي ته نږدې سرچینو تایید کړې وه چې ځینو هېوادونو ته یې د سفر مخنیوی شوی.
حامد کرزی د خپلې واکمنۍ پر مهال هم د طالبانو په پلوۍ او ورته په « ورور» ویلو د منتقدانو له نیوکو سره مخ شوی و.
د روغې جوړې لپاره د کرزي هڅې
د هغه پلویان بیا کرزی « ملي مشر» بولي چې په وینا یې د ملي روغې – جوړې لپاره یې له پيله هڅې کولې.
مخالفان یې بیا وایي چې په ۲۰۱۱ کې د طالبانو د قطر دفتر له پرانیستل کېدو وروسته د دغه دفتر پر بندېدو د کرزي ټینګار او د سولې د هغه مهال د هڅو ناکامول له سولې سره د کرزي ستره جفا وه.
له دې سره، رنګین سپنتا په خپله تازه مرکه کې حامد کرزی د افغانستان یو« وګړی» وباله او په وینا یې د ملي روغې- جوړې په تړاو د هغه نظرونه د یوه « وګړي» په توګه د کرزي حق دي.
طالبانو بیا ویلي چې کرزی او نور پخواني چارواکي هیڅوک هم نظر بند او د دوی تر فشار لاندې نه دي.
حامد کرزي په خپله وروستۍ مرکه کې ویلي وو چې د زور له لارې د طالبانو د رژیم له نسکورولو سره مخالف دی، خو له طالبانو هم غواړي چې د نجونو د زده کړو تر څنګ د خلکو نورې غوښتنې ومني او د بین الافغاني مذاکراتو له لارې ملي روغه جوړه راولي.
د یادونې وړ ده چې پر پخوانیو چارواکو د سفر او لیدنو کتنو محدودیتونه زیات شوي دي.
