امریکا وايي چې د دوحې په غونډه کې د طالبانو نه ګډون د حیرانتیا خبره نه ده، ځکه دوی نورې موخې تعقیبوي

د امریکا د بهرنیو چارو وزارت ویلي، د دوحې په غونډه کې د طالبانو نه ګډون د حیرانتیا خبره نه‌ده او طالبان نورې موخې تعقيبوي.

د امریکا د بهرنیو چارو وزارت د دوحې په غونډه کې د طالبانو نه ګډون ته په اشارې سره وايي، طالبان یوازيني افغانان نه‌دي چې د افغانستان په راتلونکي کې ونډه لري.

د دغه وزارت ویاند متیو مېلر د سه‌شنبې په ورځ په یوه خبري غونډه کې خبریالانو ته وویل، طالبان د دوحې په غونډه کې ځکه ګډون ونه‌کړ چې د ده په وینا دوی بېلابېلې موخې تعقیبوي. خو هغه په ډاګه نه‌کړه چې طالبان کومې موخې تعقیبوي.

د دوحې په غونډه کې د طالبانو نه ګډون

نوموړي د دوحې په ناسته کې د طالبانو د استازي د برخې نه اخيستلو او د افغانستان د مدني ټولنې له استازو سره د روسیې او ایران د استازو د په څنډه کېدو په اړه د یوې پوښتنې په ځواب کې وویل: “طالبان یوازيني افغانان نه‌دي چې د افغانستان په راتلونکې کې ونډه لري.”

نور ولولئ: د امریکا بهرنیو چارو وزیر له افغانستانه د امریکايي ځواکونو د وتلو پرېکړه سمه وبلل

نور ولولئ: د افغان ځواکونو په تړاو د کانګرېس ناستې په اړه د امریکا بهرنیو چارو وزارت خاموشي

نور ولولئ: میتو میلر: افغانستان زموږ تر څار لاندې دی، د القاعده مشر وژنه یې ښه ثبوت دی

نوموړي دغو دواړو هېوادونو ته سپارښتنه وکړه چې نه یوازې له طالبانو سره بلکې د افغانستان له مدني ټولنې سره هم اړيکې بايد ولري.

د روسیې او ایران ځانګړو استازو د دوحې په غونډه کې د افغان ښځو د حقونو او د مدني ټولنې له پنځه استازو سره له لیدو ډډه وکړه.

د میلر څرګندونو ته د طالبانو غبرګون

د طالبانو د حکومت ویاند ذبیح الله مجاهد د دوی تر واک لاندې ملي راډیو تلوېزیون ته د متیو مېلر څرګندونو ته په غبرګون کې ویلي، د دوی حکومت د افغانستان استازیتوب کوي او امریکا په تېرو شلو کلونو کې د خپلې مداخلې خوند څکلی او باید خپلې تېروتنې تکرار نه کړي.

متيو مېلر دا هم ویلي، امریکا بشري حقونو ته د طالبانو پر درناوي او افغانستان د ترهګرۍ پر مرکز د بدلېدو پر مخنیوي ټینګار کړی دی.

مېلر وايي: د طالبانو له‌خوا د بشري حقونو په ځانګړي توګه د نجونو او ښځو حقونو ته د درناوي په اړه اندېښنې دي.

هغه وویل: “موږ د يو څو مسئلو د په لاس راوړلو په هڅه کې يو. لومړی دا چې افغانستان د ترهګرو په ګرم مرکز بدل نه‌شي ترڅو په نورو هېوادونو هم اغېزه وکړي، دوهم د ټولګډونه او هراړخیز حکومت رامنځته کول دي چې ټول اړخونه په‌کې شتون ولري او درېیم د طالبانو له‌خوا د بشري حقونو په ځانګړي توګه د نجونو او ښځو حقونو ته د درناوي په اړه اندېښنې دي.”

د یادونې  وړ ده چې طالبان خپل اوسنی رژیم د ټولو افغانانو بولي، خو په اصل کې داخلي او نړیوال مشروعیت نه لري.