سیاحتي سیمو د پېژندنې لپاره بلخ کې انځوریز نندارتون جوړ شو
په بلخ کې د تاریخي، فرهنګي او سیاحتي سیمو د معرفي کولو لپاره انځوریز نندارتون جوړ شوی دی. د نندارتون موخه کورنیو او بهرنیو سیلانیانو ته د دغه ولایت د مهمو ځایونو ورپېژندل او د سیاحت وده ښودل شوې ده.
دغه نندارتون د بلخ د اطلاعاتو او فرهنګ ریاست له لوري د بلخ ولسوالۍ په تاریخي نهګنبدي جومات کې جوړ شوی و.
په نندارتون کې د بلخ د بېلابېلو تاریخي، فرهنګي او طبیعي ځایونو انځورونه نندارې ته وړاندې شول.
سیاحتي سیمو د معرفي کولو لپاره هڅې
د بلخ د اطلاعاتو او فرهنګ رئیس محمدالله ضرار ویلي، د تاریخي او فرهنګي ځایونو ښه معرفي کول د سیاحت له ودې سره مرسته کوي او د بلخ د لرغوني تاریخ او فرهنګي ارزښتونو په پېژندنه کې مهم رول لري.
د هغه په وینا، د تاریخي او سیاحتي سیمو د لا ښه معرفي کولو ترڅنګ، سیلانیانو ته د مناسبو اسانتیاوو د برابرولو لپاره هم هڅې روانې دي.
نوموړي زیاته کړې چې له سیاحتي شرکتونو سره به همکاري پراخه شي، څو بلخ ته د کورنیو او بهرنیو سیلانیانو د ورتګ زمینه نوره هم برابره شي.
بلخ او تاریخي ارزښتونه
د بلخ د سیاحتي شرکتونو د اتحادیې رئیس حامد صمیم، د بلخ پوهنتون استاد وزیر احمد فوشنجي او د سیاحتي شرکتونو یو شمېر مسوولینو د ورته نندارتونونو جوړول د سیاحت لپاره مهم بللي دي.
دوی د تاریخي او طبیعي ځایونو پر پراخې معرفۍ او سیلانیانو ته د غوره اسانتیاوو پر برابرولو ټینګار کړی دی.
د اطلاعاتو او فرهنګ ریاست د معلوماتو له مخې، بلخ د څو زره کلن تاریخ ترڅنګ له سلو څخه زیات تاریخي او فرهنګي ابدات او ګڼ طبیعي او سیاحتي ځایونه لري.
