د شانګهای سازمان رئیس له طالبانو غوښتي چې په افغانستان کې عاجل ټولګډونه حکومت جوړ کړي
د شانګهای سازمان داسې مهال د طالبانو له رژیم دغه غوښتنه کوي چې دغه ډلې په افغانستان کې ټول واک یوازې د مدرسو فارغانو ته ورکړی او نور اړخونه ددوی په حکومت کې ګډون نه لري.
پر طالبانو نیوکه همدا ده چې هم یې د افغانستان ټول ثروت او شتمنۍ منحصرې کړي او هم یې ټول مسلکي بستونو هغو ملایانو ته ورکړي چې له مدرسو فارغ او بې سواده بلل کېږي.
افغانستان کې له طالبانو د ټولګډونه حکومت د جوړېدو غوښتنه
تازه د شانګهای همکارۍ سازمان مشر له طالبانو نه په افغانستان کې د یوه ټولشموله حکومت او کابینېد جوړولو غوښتنه کړې ده. د یاد سازمان مشر ژانګ مینګ وايي، دوی له افغانستان [طالبانو] نه هیله لري چې د ټولو افغان قومي، مذهبي او سیاسي ډلو د استازو په ګډون کابینه جوړه کړي.
ژانګ مینګ د روسیې ایزوستیا ورځپاڼې ته په مرکه کې ویلي، چې « د افغانستان مساله، په ځانګړې توګه په سیمه کې د سولې، ټیکاو او امنیت له اړخه ډېره مهمه ده».
نور ولولئ: افغانستان به د شنګهای غونډې د بحث سرټکی وي
نور ولولئ: له چین د مولوي کبیر غوښتنه: د شنګهای راتلونکې غونډه کې د ګډون بلنه راکړئ
دغه خبر د شانګهای همکارۍ سازمان پر رسمي پاڼه تر دې سرلیک لاندې چې « د شانګهای سازمان سرمنشي ژانګ مینګ د افغانستان په اړه د دغه سازمان دریځ روښانه کړ»، خپور شوی.
له ترهګرو او نشه یي توکو ویره
ژانګ مینګ هیله ښودلې چې افغانستان د ترهګرۍ، جګړې او نشه يي توکو مرکز ونه اوسي.
د شانګهای همکارۍ سازمان مشر وايي، « هیله من یو چې په راتلونکي کې افغانستان کې د ټولو سیاسي ، قومي او مذهبي ډلو د استازو په ګډون دولت رامنځته شي».
ژانګ مینګ یو ټول شموله دولت د افغانستان په ګټه بللی او زیاته کړې یې ده، چې دا ډول دولت به هم د شانګهای همکارۍ سازمان او هم د ټولې نړیوالې ټولنې په ګټه وي.
افغانستان له۲۰۱۲ کال راهیسې د شانګهای سازمان څارونکی غړی دی، خو دمګړۍ یې رول یوازې په رسمي ډول د اعتبار وړ دی، ځکه د طالبانو ګڼ مشران چې ددې ډلې د حکومت پر لوړو څوکیو کار کوي، د ترهګریزو فعالیتونو له امله د یاد سازمان تر بندیزونو لاندې دي.
پر دې سربېره، د نړۍ نورو هېوادونو هم له طالبانو په افغانستان کې د ټولګډونه حکومت د جوړېدو غوښتنه کړې، خو طالبان د نړیوالو سازمانونو او هېوادونو دغه غوښتنې ته د ځواب ویلو لپاره حاضر نه دي.
