شمالي وزیرستان کې پر پاکستاني پوځیانو برید کې ۶ هلاک شوي او ۲۴ نور ژوبل شوي دي

راپورونه وايي، د خیبر پښتونخوا په شمالي وزیرستان کې د وسلوالو په برید کې د یو پوځي افسر په ګډون شپږ پوځیان وژل شوی دي.

په میرانشاه کې انتظامي او استخباراتي چارواکو رسنیو ته وویل چې د اکتوبر پر پینځمه په سپین وام کې وسلوالو د پوځیانو پر کاروان برید وکړ چې پکې لیفټېننټ کرنل محمد علي شوکت او پینځه سرتېري ووژل شول.

د پاکستاني پوځ د عامه اړیکو دفتر (ای اېس پي ار) هم په دې اړه بیان جاري کړی چې یې پکې د وژل شوي افسر او سرتېرو نومونه خپاره کړي او پکې راغلي دي چې د پوځیانو سره په ډزو کې شپږ مشکوک وسلوال هم وژل شوي دي. بیان زیاتوي چې تر برید وروسته هلته د لټون عملیات دوام لري.

که څه هم د ای اېس پي ار په بیان کې د ژوبلو سرتېرو په اړه څه نه دي ویل شوي خو د شمالي وزیرستان انتظامیې او استخباراتي ادارې ځینو سرچینو ویلي چې په یاده پېښه کې ۲۴ سرتېري ژوبل شوي هم دي.

نور ولولئ: پاکستان کې یوه جومات ته نژدې برید شاوخوا ۵۲ تنه وژلي دي

نور ولولئ: پر پاکستاني پوځ برید کې پوځ ته مرګ ژوبله اوښتي ده

نور ولولئ: خیبر پښتونخوا: پر پاکستاني پوځ ځانمرګي برید ۹ پوځیان وژلي دي

د برید ذمه واري لا چا نه ده منلې

په شمالي وزیرستان کې له تېرو څو کلونو راهیسې ناامنۍ زور نیولی دی چې په کې په هدفي وژنو، بمي چاودونو او په بریدونو کې د امنیتي ځواکونو په ګډون د سیمې خلکو مرګژوبله اوښتې ده.

د سېپټېمبر پر ۲۱ مه میرلي بازار ته نېږدې د پوځ او وسلوالو ترمينځ نښته شوې وه چې پکې د مرګژوبلې خبرونه ورکړل شوي وو. پوځ په هغې نښته کې د پينځو وسلوالو د وژنې او د اتو نورو د ژوبلولو خبر ورکړی وو. پوځي سرچینو په هغه نښته کې د څلورو عکسرو د ژوبلېدو هم ویلي ول.

د نښتې په مهال د میرلي بازار په د څارویو په منډۍ کې اور لګېدلی وو. پښتون ژغورنې غورځنګ (پي ټي اېم) ويلي چې په ميرلي کې د څارويو په منډۍ کې د پوځ د مارټر ګولو (هاوان مرميو) له امله لسګونه غواوې او مېښې له منځه تللې وې.

په شمالي وزیرستان کې اعتراضونه

په شمالي وزیرستان او د خیبر پښتونخوا په نورو ضلعو کې د ناامنۍ ضد خلکو وخت په وخت پراخ احتجاجونه، جرګې او لاریونونه هم کړي دي.

په سیمه کې د ناامنۍ ضد د اتمانزیو جرګې احتجاج د تېرو څو ورځو راهیسې روان دی. دوی د سیمې د امنیت پر ځای کول، د هدفي وژنو مخنيوی، د عملياتو پر مهال د ولسي وګړو نه ځورول او نه ګرفتارول، د ۲۰۱۴ کال د پوځي عملیاتو او ناامنیو پر مهال د ميرامشا د ړنګ شوي بازار دوکاندارانو ته د تاوان ورکولو غوښتنې کوي.

بل خوا ته، د پاکستان حکومت او پوځ وايي چې د ترهګرۍ ختمولو ته ژمن دي او د دې لپاره یې د وسلوالو پرضد هدفي عملياتو ته دوام ورکړی دی.