د طالبانو امیر شیخ هیبت الله اخوند وايي، موږ د غرب د رضایت لپاره شرعي حدود نه شو پرېښودلی
هاخوا بیا د بشر حقونو بنسټونه د طالبانو پر کمزوري قضايي سیسټم په نیوکې سره وايي، طالبان په اوسني عصر کې د جرمونو په تشخیص او پېژندنه کې دودیزه تګلاره کاروي چې کېدای شي، بې ګناه خلکو ته درنې سزاګانې ورکړي.
د طالبانو حکومت مشر هبت الله اخوندزاده په یوه غږیز کلیپ کې چې هغه ته منسوب شوی، وايي چې پر ښځو به په عام محضر کې د سنګسار او درو وهلو سزا پلې کوي.
موږ د غرب د رضایت لپاره شرعي حدود نه شو پرېښوولی
د نوموړي دا کلیپ د طالبانو حکومت تر کنترول لاندې ملي راډیو نن د وري پنځمه پر خپل ایکسپاڼه یا پخواني ټویټر خپور کړی، خو د ثبت د کره وخت او ځای په اړه یې څه نه دي ویل شوي.
نور ولولئ: د طالبانو د اعدامونو لړۍ؛ جوزجان کې بل کس اعدامېږي
نور ولولئ: د م.م د بشري حقونو عالي کمېشنري: طالبان دې اعدامونه او سزاوې ودروي
نور ولولئ: د جوماتونو له ملایانو د ندا محمد ندیم غوښتنه: “د منبر له لارې د اعدام د حکم له عملي کېدو دفاع وکړئ”
د طالبانو حکومت مشر هبت الله اخوندزاده په دې کلپ کې لوېدیځ ته په خطاب سره وايي: “ته (غرب) به دا وايې چې دا د ښځو د حقونو تر پښو لاندې کول دي چې ته یې په ډبره ولې. سبا به موږ د زنا حد تطبیقوو، په عام محضر کې به ښځې په ډبرو ولو، سبا به موږ د الله حدود نافذوو په عام محضر کې په درو به وهل کوو، دا ټول ستا د دیموکراسۍ خلاف دي، پر دې هر یو به ستا مقابله روانه وي.”
د قصاص او په دُرو وهلو د سزاګانو دوام
نوموړی په دې کلیپ کې، چې د طالبانو یو شمېر چارواکو بیا پرون د وري په څلورمه په خپلو ټولنیزو پاڼو خپور کړی، لوېدیځ ته په خطاب کې دا هم وايي: ” شل کاله مو درسره جګړه کړې او شل کاله نور به هم درسره جګړه کوو، دا په دې ځای کې نه خلاصېږي. ”
دا په داسې حال کې ده چې د طالبانو حکومت په افغانستان کې له بیا واکمنېدو وروسته څو ځله په عام محضر کې د ښځو په ګډون یو شمېر خلک، چې د دوی په خبره بېلابېل جرمونه یې ترسره کړي او په ټکو یې محاکمو یې پرې پرېکړه کړې په درو وهلي او د دې تر څنګ د قصاص حکم یې هم پلی کړی دي.
هاخوا د بشري حقونو بنسټونه اندېښنه لري چې طالبان له تورنو کسانو د شکنجې، وهلو او ټکولو په زور اقرار اخلي او داسې هم کېدلی شي چې دغه ډله بې ګناه کسانو ته دغه درنې سزاګانې ورکړي.
