اړوند خبر:
د ټرانس افغان ریل لاره: ازبکستان به د کندهار یا د مزارشریف لار غوره کړي؟
د طالبانو د ریاستالوزرا اقتصادي مرستیال عبدالغني برادر او د قزاقستان لومړي وزیر مرستیال سریک ژومانگارین له یوه او بل سره کتلي دي.
د طالبانو حکومت وایي چې د قزاقستان پلاوي افغانستان د سفر پر مهال د دې هېواد د مهمو سکټورونو په ګډون، د اورګاډي پټلۍ جوړولو، کانونو، نفت، ګاز او نورو بنسټیزو پروژو کې د پانګونې چمتووالی ښوولی دی.
په اعلامیه کې چې د طالبانو تر کنټرول لاندې ارګ خپره کړې، راغلي چې د قزاقستان د لومړي وزیر مرستیال سریک ژومانگارین او ورسره مل پلاوي د دوشنبې په ورځ، د ثور میاشتې په لومړۍ نېټه په کابل کې د ریاستالوزرا اقتصادي مرستیال عبدالغني برادر سره د خپل هېواد د پانګونې لیوالتیا خبرې کړي دي.
خبرپاڼه کې راغلي چې قزاقستان د ۵۰۰ میلیونه ډالرو په ارزښت د پانګونې پلان لري، ترڅو د تورغنډي – هرات – سپینبولدک اورګاډي پټلۍ جوړه کړي، او ترڅنګ یې د کانونو، نفت، ګاز، او د انټرنېټ تمدید په برخو کې پانګونه وکړي.
د کابل پوهنتون پخوانی استاد او اقتصادي چارو کارپوه، استاد سید مسعود د دې موضوع په اړه وايي: “افغانستان کې د اوسني وضعیت له مخې، قزاقستان ته د پانګونې مناسب شرایط شته”
اعلامیه کې د سریک ژومانگارین له قوله ویل شوي چې قزاقستان د پرمختللي او خپلواک افغانستان ملاتړ کوي.
