اړوند خبرونه:
UNHRC د بشري حقونو په برخه کې د متحده عربي اماراتو موقف وستایه
د متحده عربي اماراتو خواخوږي؛ له زلزله ځپلو سره یې بېړنۍ مرسته وکړه
متحده عربي اماراتو کې له افغان مشرانو او سوداګرو سره د ټوماس وېسټ لیده کاته
د ۲۰۲۵ کال د مې ۲۸مه – د افغانستان لپاره د طالبانو د ديپلوماتیکو هڅو په دوام، متحده عرب اماراتو د طالبانو د استازي عبدالرحمان فدا استوارنامه (اعتمادنامه) د افغانستان د سرقونسل په توګه په رسمي ډول ومنله. د اماراتو د بهرنیو چارو وزارت د یوې رسمي اعلامیې له مخې، دغه استوارنامه د سهشنبې په ورځ د دې هېواد د بهرنیو چارو وزارت د دوبۍ د دفتر مشر، شیخ مکتوم بن بطي آل مکتوم، له خوا واخیستل شوه.
اعلامیه زیاتوي، چې شیخ مکتوم د عبدالرحمان فدا د سرقونسل په توګه د ټاکل کېدو هرکلی کړی او ورته یې د بریا هیله څرګنده کړې ده. همداراز نوموړي د افغانستان او متحده عرب اماراتو تر منځ د سیاسي، اقتصادي، سوداګریزو او پانګوالۍ اړیکو پر پراخوالي خوښي ښودلې ده.
دا اقدام داسې مهال کېږي چې د طالبانو له واکمنېدو نږدې څلور کاله تېر شوي، خو لاهم هېڅ هېواد د دوی حکومت رسمي نه دی پېژندلی. سره له دې، ځینو هېوادونو له طالبانو سره محدوده ديپلوماتیکه همکاري پیل کړې، چې له هغو څخه متحده عرب امارات مخکښ یادېږي.
د سرقونسل د اعتمادنامې منل په سیمهیزه کچه طالبانو ته د یو مهم ديپلوماتیک موقف په توګه ارزول کېږي، که څه هم دا د رسمي پېژندنې بدیل نه دی، خو د دوی ديپلوماتانو ته د رسمي تعامل لاره هواروي. دا ګام ښيي چې امارات متحده عرب د عمل له مخې له طالبانو سره د اړیکو پراخولو ته لېواله دی، که څه هم د رسمي اعتراف پر موضوع له نړیوالې اجماع سره منتظر پاتې دی.
د دوبۍ سره د طالبانو حکومت ديپلوماتیک تعاملات ښيي چې دوی هڅه کوي د افغانستان د خصوصي سکتور د فعالیتونو لپاره نړیوال چاپېریال ښه کړي. د افغانستان خصوصي سکتور، چې له وړاندې له دوبۍ سره پراخې سوداګریزې اړیکې لري، کېدای شي له دې اقداماتو مستقیمه ګټه واخلي. د افغانستان د صادراتو لویه برخه د اماراتو له لارې نړیوالو بازارونو ته لېږدول کېږي، چې په ۲۰۲۴ کال کې د افغان صادراتو له ۱.۴ میلیارد ډالرو څخه شاوخوا ۳۵ سلنه یوازې له اماراتو سره تبادله شوې وه.
د عبدالرحمان فدا د اعتمادنامې منل، که څه هم د رسمي مشروعیت معنا نه لري، خو طالبانو ته د نړیوالو سره د خبرو د دوام لپاره یو مهم پرمختګ ګڼل کېږي. دا کیدای شي د نورو هېوادونو لپاره هم یو ډول سیاسي او ديپلوماتیک اشارې وي، چې د تعامل یو نوی باب پرانیزي.
