نجیب الله جامع به په بحثونو کې د طالبانو پر کړنو او سیاسي دریځونو نیوکې کولې
رسنیو ته سرچېنو منلې، چې طالبانو د پوهنتون استاد او د طالبانو پر کړنو نیوکه کوونکی نجیبالله جامع نیولی.
که څه هم هغه په سر کې د طالبانو ملاتړی و او په هېواد کې یې د امنیت له ټینګښته ننګه کوله؛خو وروستیو کې یې پر طالبانو نیوکې زیاتې کړې او پر خلکو د لګیدلو بندیزو پر وړاندې یې مخالفت وکړ.
د استخباراتو له لوري د نوموړي نیول کېدل
د طالبانو استخباراتي ادارې د چهارشنبې په ورځ (د وري ۱۵مه) له ښاغلي جامع سره له اړیکې وروسته هغه وربللی او نیولی یې دی.
طالبانو تر اوسه د نجیبالله جامع د نیول کېدو په اړه څه نه دي ویلي.
ښاغلي جامع په وروستیو ټلویزیوني بحثونو کې د نجونو لپاره د زدهکړو غږ پورته کړ او له واکمنانو یې د نجونو لپاره د ښوونځیو د بیا پرانیستلو غوښتنه کوله.
نور ولولئ: طالبانو سره زنداني مطیع الله ویسا ته د هالیووډ مشهورې لوبغاړي انجلینا جولي لیک
نور ولولئ: د طالبانو پر استخباراتو د بښنې نړیوال سازمان غږ؛ احمد فهیم عظیمي او صدیق الله افغان خوشي کړئ
په خواله رسنیو کې ګڼو کسانو د ښاغلي جامع پر نیولو نیوکې کړې او لیکلي یې دي: «جاهله ډله هڅه کوي، چې افغانان په ناپوهۍ او تیارو کې وساتي.»
نجیب الله جامع د خپلې اېکس پاڼې په وروستي یادښت کې لیکلي، چې د افغانستان د خلکو له مدني، سیاسي، اقتصادي او فرهنګي حقونو مبارزه کوي.
د ملت غږ اوچتول
په دغه یادښت کې چې د چهارشنبې په ورځ د وري په ۱۶مه خپور شو راغلي:« دا یوه ملي دنده او رسالت دی، چې ملي هویت، ملي ارزښتونه او د خپل ملت لپاره غږ اوچت کړم.»
ویل کېږي، چې ښايي طالبانو ښاغلی جامع د همدغو وروستیو څرګندونو په تور چې د نجونو د زدهکړو او په افغانستان کې د یوه قانونمند نظام په اړه یې کړې وې نیولی وي.
طالبانو په تېرو دوه نیمو کالو کې ګڼې مېرمنې، د پوهنتون استادان، خبریالان او د دوی پر ډلې نیوکه کوونکي نیولي او بندیان کړي دي.
د بشري حقونو بنسټونو د دغو نیول شویو کسانو د خوشې کولو غوښتنه کړې؛ خو طالبانو په دې اړه له هر ډول خبرو څخه ډډه کړې.
له دې وړاندې هم طالبانو د نظر هغه خاوندان نیولي او زندانونو ته یې اچولي چې ددوی د محدودیتونو او ناسمو پالیسیو پر وړاندې یې غږ اوچت کړی دی.
طالبانو د افغان ښځو او نجونو پر وړاندې د زده کړو دروازې تړلي او له کار کولو یې منع کړي دي.
