د طالبانو حکومت ویاند ذبیح الله مجاهد وايي چې د مالیې وزارت پخوانی سرپرست هدایت الله بدري د افغانستان بانک د سرپرست په توګه ټاکل شوی دی
نوموړي نن چهارشنبه مارچ ۲۲مه چې د وري مياشتې له دويمې نېټې سره سمون خوري، د دې ټاکنې په اړه نور مالومات نه دي ورکړي.
هدایت الله بدري پر افغانستان د طالبانو حکومت تر حاکمیت وروسته بیا تر دا مهاله د طالبانو په کابینه کې د افغانستان د مالیې سرپرست وزیر و.
دا په داسې حال کې ده چې تر دې مخکې د مالیې وزارت له سرپرستۍ څخه د هدیت الله بدري د استعفا په اړه آوازې ورکړل شوې وې. ویل کیږي چې هغه د طالبانو له مشر ملا هبت الله سره د عوایدو پر سر د اختلافاتو له امله له دندې استعفا ورکړې وه. خو طالب چارواکو مخکې د هغه د استعفا آوازې رد کړې وې.
د هدیت الله بدري تر ټاکنې مخکې مولوي عبدالقاهر مشهور په حاجي ادریس د افغانستان بانک سرپرست رئیس و.
ویل کیږي چې هدایت الله بدري او حاجي ادریس تر دې مخکې هم د طالبانو د مالیي چارو مسوولین وو.
دا په داسې حال کې ده چې پر افغانستان د طالبانو له حاکمیت وروسته د افغانستان شاوخوا ۹ میلیارده ډالره پانګه د متحده ایالاتو لخوا کنګل شوې ده.
په همدې اړه نړيوالې ټولنې هم له طالبانو غوښتي و چې دوه مسوولين له دندې لرې کړي
نړیوالې ټولنې تر دې مخکې د طالبانو له حکومت څخه د افغانستان بانک د دوو مسوولینو د لرې کېدو غوښتنه هم کړې وه چې یو تن یې د متحده ایالاتو د بندیزونو په لېست کې هم شامل دی. خو د طالبانو حکومت هغه مهال دغه غوښتنه رد کړې وه.
د دې غوښتنې له مخې د افغانستان بانک رهبري باید تجربه کاره او کارپوه کسانو ته وسپارل شي چې د دې خبرې ضمانت ورکړل شي چې طالبان به د افغانستان بانک په چارو کې مداخله نه کوي.
د خبري منابعو له قوله، که څه هم طالبان او د افغانستان بانک پر ځینو عمومي اصولو سره سلا شوي دي خو په مرکزي بانک کې د پیسو د غیر قانوني انتقال د څارنې په موخه یې د یو خپلواک پلاوي له ګومارنې سره هوکړه نه ده کړې.
نور ولولئ: د افغانستان بانک: نوي بانک نوټونه به د اړتیا پر بنسټ بازار ته وړاندې شي
پر همدې مهال د پیسو نړیوال صندوق پخواني سلاکار طارق فرهادي امریکا غږ ته وویل چې هدایت الله بدري په کابل کې د طالبانو حکومت له ځینو موضوعاتو سره رضایت نه لاره چې له همدې امله یې د طالبانو مشر ته خپل استعفا وړاندې کړې وه.
د ښاغلي فرهادي په خبره د طالبانو مشر اوس هغه د افغانستان بانک د سرپرست په توګه ټاکلی دی.
فرهادي زیاته کړه: “دغه تغیرات په هیڅ وجه د لوېدیځو هیوادونو او نړۍ په غوښتنه نه دي رامنځته شوي. د هغه ستونزو له امله چې د طالبانو په منځ کې راپیدا شوي دي، راغلي دي.”
هغه زیاته کړې چې د ځینو کسانو د مالوماتو پر اساس شاید هدایت الله بدري دغه نوې دنده ونه مني، ځکه چې د طالبانو په منځ کې ځيني ستونزې رامنځته شوې چې تر اوسه ښې روښانه نه دي، خو طالبانو لا تر دې مهاله په دې اړه څه نه دي ویلي.
