د طالبانو اړوند رسنۍ خبر ورکوي چې په بغلان کې د مقاومت جبهې دوه غړي یې وژلي دي
په ورته وخت کې سرچینې تائیدوي، چې د طالبانو په کمین او د مقاومت جبهې له ځواکونو سره په نښته کې د دې جبهې یو قوماندان او یو بل غړی وژل شوي دي.
په بغلان کې سرچینو جمعه د چنګاښ پر ۸مه، افغانناو ته وویل چې قوماندان عبدالصمد کوه ګدای چې په قوماندان حمزه مشهور و، د خیر محمد په نوم د یو کس په ګډون له دوو نورو کسانو سره د نهرین کوه ګدای سیمې ته د طالبانو پر وړاندې د عملیاتو لپاره تللي و، چې د طالبانو له کمين سره مخ شول.
د سیمې ناسمه ارزونه
سرچينې ادعا کوي، چې د دې جبهې غړي په داسې حال کې چې د سيمې او هلته د طالبانو د حضور په تړاو یې کره معلومات نه لرل، عملیاتو ته لېږل شوي وو.
د دې سرچينې د معلوماتو له مخې، د جبهې نظامي قوماندان او د تېر حکومت د پوځ لوی درستیز قدم شاه شهيم په ډېر ټينګار سره د دغو عملياتو امر ورکړى و.
سرچينه د دغې جبهې د غړو د مرګ ژوبلې مسوول شهيم بولي، ځکه د سیمې او هلته د طالبانو د حضور د څرنګوالي په تړاو یې له مطالعې پرته امر کړی چې دغه قوماندان د طالبانو پروړاندې عملیات ترسره کړي.
قدم شاه شهیم غبرګون نه دی ښوولی
سرچینه ادعا کوي، چې د شهیم د تېروتنې په پایله کې تېر کال په بدخشان کې هم د جبهې څو غړي ووژل شول.
د ملي مقاومت جبهې تر اوسه په دې تړاو په رسمي ډول څه نه دي ویلي.
د طالبانو په کمین کې دغه وژل شوي قوماندان، تېره اوونۍ په یوه ویډیو کې خپل موجودیت اعلان کړ او د دغې ډلې پر وړاندې یې پر وسله وال مقاومت ټينګار وکړ.
خو له دې سره، سره اکثره افغان سیاسیون او نړیوال په دې نظر دي چې په افغانستان کې د حل یوازنۍ لار خبرې اترې دي.
پر طالبانو هم نیوکه کېږي چې د جنګ له لارې قدرت ته ورسېدل او مذاکراتو ته پاملرنه، نه کوي. کارپوهان وايي، که افغانستان بیا د بدبختۍ خواته ځي، نو پړه به یې د طالبانو د رژیم وي.
د مقاومت جهې غړي څو ورځې وړاندې د احمد مسعود تر مشرۍ لاندې په ویانا کې راټول شوي وو او د افغانستان په تړاو یې ناسته وکړه.
