طالبان خلکو ته په ورځیني ډول د پاسپورټ صادرولو ظرفیت ۵۰زرو ته لوړ کړی

اړوند خبرونه: 

هېوادوال: پاسپورټ دفتر دې ژر تر ژره بیا فعالیت پیل کړي

د الکترونیکي تذکرو او پاسپورټ سېستمونو د نښلولو د هوکړې لاسلیک

سعودي له افغانانو ۱۲ زره پاکستاني پاسپورټونه ضبط کړي

د پاسپورټ ریاست عمومي رییس اعلان وکړ، چې د خدماتو د ښه‌والي او د خلکو د مخ په زیاتېدونکي غوښتنې د پوره کولو لپاره د هېواد د پاسپورټ د صادرولو ظرفیت په ورځ کې ۵۰ زره  ته لوړ شوی دی.

د افغانستان د پاسپورټ ریاست عمومي ریس جنرال عبدالکریم حسیب په کابل کې په یوه خبري کنفرانس کې وویل، چې دا اداره اوس د ورځې ۵۰ زره پاسپورټونه چاپولو توان لري. هغه زیاته کړه چې د دې پروسې د پیاوړتیا لپاره، نوي سرورونه اخیستل شوي او نصب شوي دي چې کولی شي په راتلونکې پیړۍ کې د افغانستان د مخ په زیاتېدونکي نفوس اړتیاوې پوره کړي.

ښاغلي حسیب یادونه وکړه، چې دا سرورونه د ذخیره کولو لوی ظرفیت لري او د سلګونو زرو غوښتونکو پورې اړوند معلومات په دقت او امنیت سره ذخیره کوي. هغه دا اقدامات د خدماتو ډیجیټل کولو او د پاسپورټ مرکزونو کې د ګڼې ګوڼې کمولو لپاره یو بنسټیز ګام وګڼل.

په وروستیو کلونو کې د پاسپورټونو په تقاضا کې د پام وړ زیاتوالي وروسته، په ځانګړې توګه د ناامنۍ او پراخه کډوالو په پایله کې، په افغانستان کې مسوولو ادارو هڅه کړې چې د پاسپورټ وېش پروسه اسانه کړي.

پخوا، تخنیکي نیمګړتیاوې او د اسانتیاوو نشتوالي د پاسپورټ د صادرولو پروسه ورو کړې وه. حکومتي چارواکي وايي، چې د زیربناوو او ټیکنالوژۍ په برخه کې د پانګونې سره، د پاسپورټ خدمات اوس داسې مرحلې ته رسېدلي دي چې کولی شي د هېواد اوسني او راتلونکي اړتیاوې پوره کړي.