د طالبانو تر کنټرول لاندې محکمه وايي، په خوست کې ۱۷ کسانو ته په عام محضر کې سزا ورکړي ده
په داسې حال کې چې د طالبانو پر قضايي سیسټم نیوکې کېږي، په ولایاتو کې د خلکو پر وړاندې خلکو ته سزاګانې ورکوي او په درو یې وهي.
د طالبانو ستره محکمه وايي، چې په خوست کې یې ۱۷ کسانو ته د « لواطت، نامشروع اړیکو او غلا» له امله تعزیري سزا ورکړې ده. نړۍوال د طالبانو داسې کړنې غندي، خو طالبان وایي، په دغه کار سره «شریعت» پلی کوي.
د طالبانو سترې محکمې نن پنجشنبه د (لړم درېیمه نېټه) د یوې خبرپانې په خپرولو سره ویلي، چې د خوست لومړۍ محکمې تېره ورځ چهارشنبه ۱۷ کسانو ته د «لواطت، نامشروع اړیکو او غلا» په تور تعزیري سزا ورکړې ده.
په سزا رسېدلو کسانو هویئت نه دی څرګند
د خبرپاڼې له مخې، دغه پرېکړه د دغې ډلې د سترې محکمې له تایید وروسته د خوست لومړۍ محکمې له لوري په عام محضر کې پر ۱۷ تنو عملي شوه.
نور ولولئ: د خوست طالب والي: افغانستان لوستي بشري قوه له لاسه ورکړي ده
نور ولولئ: طالبانو په خوست ولایت کې د تېر نظام یو سرتېری له سختو وهلو وروسته زندان ته اچولی
په خبرپاڼه کې د تورنو کسانو د هویت په اړه څه نه دي ویل شوي خو وايي، د محکمې د پرېکړې له مخې اوو تنو ته چې طالبانو مجرمان بللي، درې تنو ته یې د یو، یو کال او اته میاشتې تنفيذي بند او ۳۹ـ ۳۹ دورې تعزیري سزا ورکړل شوې او درې تنو نورو ته شپږ ـ شپږ میاشتې تنفيذي بند او له ۲۵ تر ۳۹ دورې تعزیري سزا ورکړل شوې ده.
طالبان وايي، پاتې یوه تن مجرم ته یې د لس میاشتې تنفیذي بند او ۳۹ دورو سزا ورکړې ده.
د بشري حقونو د سازمانونو نیوکې
د طالبانو ستره محکمه وړاندې وايي، چې د دغو کسانو له ډلې لس تنه یې تورن پېژندل شوي چې له ډلې یې نهو تنو هر یوه ته یو ـ یو کال تنفیذي بند سزا او له ۳۰ تر ۳۹ دورو سزا ورکړل شوې او پاتې یوه تن ته یې د یوه کال او پنځو میاشتو تنفیذي بند او ۳۹ دورو سزا ورکړې ده.
که څه هم پر طالبانو په عام محضر کې د بدني سزا ورکولو په اړه د بشري حقونو د ملاتړو سازمانونو له لوري سختې نیوکې کېږي؛ خو لا هم طالبان لږ تر لږه په یوه یا دوو ورځو کې د افغانستان په بېلابېلو ولایتونو کې پر خلکو په عام محضر کې بدني سزا عملي کوي.
پر دې سربېره د طالبانو پر قضايي سیسټم هم نیوکې کېږي او ویل کېږي چې ددوی د جرم پلټلو میتود زوړ دی او کېدای شي، زیات په کې بېګناه کسان قرباني شي.
