طالبان د خصوصي روغتونونو د ښځینه ډاکټرانو او همکارانو معلومات څه کوي؟
![7208616a 8898 4359 8e5c 57a71fb47362 cx0 cy3 cw0 w1200 r1](https://afghannow.net/wp-content/uploads/2024/01/7208616a-8898-4359-8e5c-57a71fb47362_cx0_cy3_cw0_w1200_r1-780x470.webp)
د طالبانو امر بالمعروف کسانو په کابل کې د خصوصي روغتونونو د ښځینه ډاکټرانو او همکاراتو لیست غواړي
د طالبانو د امر بالمعروف وزارت او دغه خپلې سرې ادارې د ښځو پر وړاندې خپل سري محدودیتونه ددې لامل شوي چې د ټولنه دغه مهمه برخه له هر ډول پرمختګ راوګرځوي. دوی ښځې له کار او زده کړو منع کړي، خو دا ځل یې هڅه داده چې په روغتیايي سکتور کې هم ورباندې محدودیتونه وضع کړي.
که چېرې دوی په روغتونونو کې پر ښځینه ډاکټرانو، نرسانو، قابلو او نورو کارکوونکو محدودیتونه ولګوي، نو دغه سکتور به هم د نورو پره څېر فلج او خلک به له ګڼو ستونزو سره مخامخ شي.
خصوصي روغتونونو ته امر کول
د کابل د یو شمېر خصوصي روغتونونو مسوولینو افغانستان انټرنشنل – پښتو ته ویلي، چې د طالبانو د امر بالمعروف وزارت محتسبینو ترې د ښځینه کارکوونکو نوملړ او د هغوی په اړه معلومات غوښتي دي.
نور ولولئ: ډوډۍ، کار او عدالت؛ ددې شعار ورکوونکو ښځو لاریون طالبانو په درنو ډزو تیت او پرک کړ
نور ولولئ: د طالبانو په زندانونو کې د شکنجې په اړه سروې
نور ولولئ: د ښځو پر وړاندې د طالبانو ځپونکي تګلارې؛ افغانستان په ۱۷۷ هېوادونو کې د ښځو لپاره بد هېواد دی
یادې سرچینې وايي؛ له تېرې اونۍ راهیسې د کابل بېلابېلو روغتونونو ته د امر بالمعروف غړي ورغلي دي.
د کابل په خېرخانه کې د یوه خصوصي روغتون مشر افغانستان انټرنشنل – پښتو ته وویل، چې د تېرې اونۍ د سې شنبې په ورځ د امر بالمعروف یو شمېر محتسبین د دوی روغتون ته ورغلي او له هغوی څخه یې د ښځینه ډاکترانو، نرسانو او نورو کارکوونکو په اړه معلومات غوښتي دي.
نوموړی وايي: “که څه هم موږ ورسره وغږېدو چې دا د اصولو خلاف کار دی او موږ نه شو کولی، چې تاسو ته د خپلو همکارانو په اړه معلومات درکړو؛ خو خبرو نتیجه نه ده ورکړې او موږ ته یې ویلي، چې په لسو ورځو کې باید ټول معلومات چمتو کړي”.
د خصوصي روغتون یاد مشر وویل، چې امر بالمعروف ترې د هرې ښځینه کارکوونکې نوم، پلار نوم، دنده، د کور ادرس، ټیلفون شمېره، د ټولنیزو رسنیو د اکاونټونو نومونه او یو کوچنی تصویر غوښتي دي.
د خصوصي روغتونونو د ښځینه ډاکټرانو ویره
زیاتو ښځینه ډاکټرانو ویره ښودلي. دوی وايي چې که دوی په روغتونونو، تر کورونو او د دوی د اړیکو شمېرې، او ټولنیزو رسنیو ادرسونه تعقیبېږي، نو دوی ته به سخته وي چې په ارام فکر او ارام چاپیریال کې د طب په برخه کې د ناروغانو خدمت او درملنه وکړي.
دا نوي ستونزه په داسې حال کې راپیدا کېږي چې د طالبانو له بیا واکمنېدو سره د مور او ماشوم په مړینه کې زیاتوالی راغلی دی. خو که طالبانو ښځینه کارکوونکې محدودې کړي نو کېدای شي د مور او ماشوم مړینه په نوي بحران بدله شي.