ملا خیرالله خیرخواه وايي، خپل ماشومان مدرسو ته واستوئ، چې زموږ د تاریخ پاڼې د تل لپاره زرینې پاتې شي
د طالبانو اکثره لوړ پوړي چارواکي په دې فکر دي چې یوازې مدرسې کولی شي چې د ملت تاریخ پر زرینو کرښو ولیکي او وساتي، خو د شنونکو په نظر په ننني تکنالوژیکي دور کې یوازې ښوونځي او پوهنتونونه دي چې د یوه هېواد بقا تضمینولی شي.
نور ولولئ: امریکايي چارواکي د ښځو پر وړاندې د طالبانو دریځ په سویلي افریقا کې له نژادي تبعیض سره ورته بولي
د طالبانو یو لوړپوړی مشر
د طالبانو تر کنټرول لاندې باختر اژانس په یوه راپور کې ویلي، د طالبانو د اطلاعاتو او فرهنګ وزیر په پکتیا کې د یوې مدرسې د بنسټ ډبرې د اېښودنې په مراسمو کې خلکو ته ویلي، خپل ماشومان مدرسو ته واستوئ چې زموږ د تاربخ پاڼې تل زرینې پاتې شي.
د باختر اژانس په وینا، په ګردیز ښار کې دغو مراسمو کې د طالبانو د کابینې ځینو غړو هم ګډون کړی و.
باختر اژانس د ملاخېرالله له خولې لیکلي: « ستړي نه یو، د ګوانټانامو په زندان کې مو هم هیله درلوده، چې د خدای په لاره کې به لا زحمتونه ګالو او د هغو کسانو نومونه چې د خدای په لاره کې یې خدمت کړی په تاریخ کې به په زرینو کرښو ولیکل شي او هیڅ کله به د مسلمانانو هېر نه شي.»
عصري علوم د دوی په نظر هېڅ دي
هغه د یتیمانو د سالمې او بنسټيزې زدهکړې په اړه په ټینګار سره ویلي، چې خلک باید له دغه فرصته ګټه واخلي.
دا ښايي لومړنی طالب چارواکی نه وي، چې خلک د عصري علومو د زدهکړو پر ځای مدرسهیي زدهکړو ته هڅوي، تر ده وړاندې نورو لوړ پوړو طالبانو هم په رسمي غونډو کې د عصري علومو زدهکړې مباح ګڼلې دي؛ خو داسې طالبان هم شته، چې د زامنو تر څنګ یې لوڼې هم د عصري علومو د حاصلولو لپاره په نورو هېوادونو کې په زدهکړو بوختې دي، یا خو د هغوی شمېر کم دی او خبره یې پر نورو طالبانو اغېز نه لري او یا دا چې هغوی د ځان لپاره هر څه روا بولي او د نورو لپاره یې نا روا.
نور ولولئ: رینا امیري د نجونو زده کړې اهمیت لرونکي بولي
دا په داسې حال کې ده چې خلک لا ددې تمه لري چې طالبان به د نجونو پر مخ ښوونځي او پوهنتونونه پرانیزي، خو د طالب مشران اوسنی ذهنیت ددې نه دی چې یاد ښوونځي دې پرانیزي، ځکه د شنونکو په وینا دوی له ښوونځیو سره یو ډول عقده پالي.
