د کار او ټولنیزو چارو وزارت د کابل په ګډون د افغانستان په زندانونو کې د ښځو لپاره د غالۍ اوبدلو مرکزونو د جوړولو اعلان وکړ.
د کار او ټولنیزو چارو سرپرست وزیر او د اسلامي همکاریو سازمان د استازي ترمنځ په یوه غونډه کې، هوکړه وشوه چې ډېر ژر به په کابل کې د ښځو لپاره د غالۍ اوبدلو یو مرکز او په زندانونو کې ورته یو مرکز جوړ شي.
د کار او ټولنیزو چارو وزارت اعلان کړی، چې د وزارت د مشر عبدالمنان عمري او د اسلامي همکاریو سازمان د استازي دفتر د مشر محمد سعید العیاش ترمنځ په یوه غونډه کې د ښځو لپاره د غالۍ اوبدلو مرکزونو د جوړولو لپاره هوکړه وشوه. د دې تړون له مخې، په کابل کې به د ښځو لپاره یو مرکز او همدارنګه په زندانونو کې یو بل مرکز جوړ شي، ترڅو ښځینه بندیانې هم د غالۍ اوبدلو مهارتونه زدهکړي او له دې لارې عاید ترلاسه کړي.
د دې اقدام موخه د کار فرصتونه رامینځته کول او د ښځو اقتصادي حالت ښه کول دي. د اسلامي همکاریو سازمان هم د داسې پروژو ملاتړ اعلان کړی او د ورته همکاریو پر دوام یې ټینګار کړی دی.
د غالیو اوبدلو صنعت په افغانستان کې یو له مهمو او دودیزو صنعتونو څخه ګڼل کیږي، چې د هېواد په اقتصاد کې د پام وړ ونډه لري. په تېرو وختونو کې، د هېواد په بیلابیلو سیمو کې ښځو په دې صنعت کې مهم رول لوبولی دی، خو د وروستیو بدلونونو سره، ډېری یې د کار فرصتونه له لاسه ورکړي دي. اوس، د دې صنعت د بیا راژوندي کولو، په ځانګړې توګه په زندانونو کې او ښځو ته د کار زمینه برابرولو لپاره هڅې روانې دي.
